Ka Khliehriat Block Congress Committee (KBCC) da sñiawphylla ko wym em kor X-Ray ha CHC Khliehriat kawa e chakri ya ki paidbah yong ka East Jaiñtia Hills District wa kammon ya kani ka kor wa emkaam leh ym em ko.
Da ong wa katkam i yoh yutip ka Congress Party wa ka kor X-Ray da jooh em ko ha ki por wa nachwa tangwa katni da sih ko la kamwa 5-6 snem.
Kamtæ da kylli wa ileh ka sorkar ym booh ko ya ka kor X-Ray ha kani ka CHC ha kam ini i por wa yakhun ya u COVID-19. Kam ini mo itæ i chimkhia yong ka sorkar hawa yatoh wa i chait i khiah yong ki paidbah? da kylli uwa yahkhmat ka Congress, u Piwell Shylla uwa man leh u Working President yong ka Khliehriat Block Congress Committee. Da ong u leh wa lada ka sorkar ka pynbiang ko ya ka Oxygen wow yakhun ya ka khlam, ileh won wym ye u booh ya kor X-Ray ha kani ka CHC. Deiwa kylli leh wa cheiwon kiwa chitom u phah leh X-Ray ki?
U Piwell Shylla, da kyntu u ya ka sorkar wow pynku kyrdan noh smat ya kani ka CHC cha ka Civil Hospital. Wa lada ka sorkar ka em poisa ko wow e District, ileh won ym em poisa ko wow pynku ya kani ka CHC cha ka Civil Hospital.
Kamtæ, ka Congress da kyntu ko ya ka sorkar jylla wow pait lang ya ka roi ka paar yong ka East Jaiñtia Hills District.
