U MLA ka Bharatiya Janata Party (BJP) na South Shillong, u Sanbor Shullai da ong wa ym du wa ka Party piah ko hapoh i yahkhmat u Ernest Mawrie kam u President, da ngam ko leh suki suki, wei da ong u wa kam ki MLA toh i kamram wow lum yow lang biang waroh ki wakreh ka Party wei wow ya syllok neibynta wow pynkhlan biang ya ka Party.
Da ong u wa ka Party daw khut noh ko da ka yalang, wei ha kani ka yalang daw khut lang ya waroh ki dkhot ka Party kiwa da yut yow chim ya ka rai hajrong i pteiñ wow chim rai samen u Mawrie.
Hawa kylli, da ong u wa hadooh katni ym pu ye wow ong wow pynhiar noh ya u Mawrie kam u President ka Party, tangwa ki dkhot wa chitmynsien na waroh kawi ka jylla kiwa da randien, kwah ki wow khut noh ya ka yalang wa jhan, heiwa da booh ki yei chaniah ha ki 2 ngut ki MLA wei ha ka yalang wa daw pynman daw chim ya ki rai.
Hawa yatoh wa i dawa yong u Ernest Mawrie wow hiar chuki noh u Lahkmen Rymbui hajrong i yap yong ki 6 ngut kiwa tih mooyong ha East Jaintia Hills, u Sanbor da ong u wa ym tip u iyi iyi leh, wei toh i klam yong samen u Ernest ym toh naka Party.
Da ong u leh wa waroh 2 ngut ki MLA da leh ki katwa da phah da kiwa haneiñ na Delhi wow kyrchaan ya ka sorkar Meghalaya Democratic Alliance (MDA), wei na i por cha i por da pynsñiaw leh wa lada em iwon iwon i wym hun, toh u pynsñiaw chwa ha ka Coordination Committee wow ya syllok, tangwa kamwa man katni, ki dkhot ka Party sah ki hei doom wa da yoo wa du u Ernest wa ki kattu katni ngut kiwa klam khlem da kynjoh ktien.
