Ka Rotary Club Jowai ha ka sngi Muchai 18 tarik Kmaichonglad da pynman ko ka yachemlang wa kyrpang ha Yung Yonglang ka Loom Soo Yung New Hill wei kani ka sngi daman ko leh ka sngi pynkut leh yei lehkmen lehburom ya ka Silver Jubilee Celebration.
Ha kani ka sngi najrong ki dkhot ka seiñ, da wan sakhilang leh da u Rtn. Manas Choudhury, Past District Governor RID 3240 kam u kongsan deilang u Rtn. Kishan Tibrewalla (MPHF) Assistant Governor Zone-X RID 3240 wa u Rtn. Dr. K.S. Elangbam, District Secretary Foundation RID 3240.
Ha ka yalang wa yoo chongkun yong kani ka sngi hei pynlai u Rtn. Montri Passah, (MPHF) President Rotary Club Jowai da yoh ki kyntien yahkhmat heiyatoh wa kani ka Silver Jubilee Celebration na u Rtn. S.K. Lato, Chairman Silver Jubilee Celebration neitæ ki kyntien pdiang burom wada pachat da u Rtn. J.M. Pohsngap (PHF) katwa hawa kut yong kani ka yachemlang u Rtn. Dr. D.I. Kjam da pachat u ki kyntien sñiawngooh.
Ka Rtn. E.F. Gatphooh (MPHF) Charter President of Rotary Club Jowai ha kani ka yalang da chim ko ka bynta wa kyrpang wow khana pynsñiaw yei parom i lai luti wa ki kaam kiwa ka Rotary Club Jowai da leh ko neibynta ka imlang sahlang yong ki bru wa chong chnong nadooh u snem 1995 ter ter hadooh u snem 2021.
Da pynkyrpang chooh chooh ya kani ka sngi da i pynlait paidbah ya ka Thup Sah Kynmoo næ Souvenir Silver Jubilee Celebration da u kongsan Rtn. Manas Choudhury wa i pynkup burom kyrpang ya ka Rtn. E.F. Gatphooh (MPHF) Charter President wa u Rtn. D.F. Majaw (PHF) Director Club Service kiwa man kam ki chrotskit ka Rotary Club Jowai nadooh u snem wa seiñ ya ka hadooh kini ki por ki sngi wa katni.
Kam wow e mynsien chooh chooh ya ki dkhot ka Rotary Club Jowai neiliang u Rtn. Kishan Tibrewalla (MPHF) Assistant Governor Zone-X RID 3240 wa u Rtn. Dr. K.S. Elangbam, District Secretary Foundation RID 3240 da kitbok kitrwiang wei kyrsu kyntu ki ya ki dkhot ka Rotary Club Jowai wow yaleh chooh u pynkhlan ya ka seiñ ha kiwi ki thaw yong ka Ri-loom Jaiñtia wei wow chongpyrkhat leh u kreh ya kiwi ki kaam kiwa man katkam i yah ka juk ka por wei kiwa e myntoi ya ka imlang sahlang yong ki bru wa chongchnong.
U Rtn. Manas Choudhury (Major Donor) Past District Governor RID 3240 hei e kyntien kam u kongsan yong kani ka sngi, ong u i ye ka Rotary Club Jowai wow pyndep yei lai luti wa 25 tylli ki snem ymtoh iwa suk wei yaroh u leh ya ka seiñ kawa da chim sakhiat ka yukit wa khia wow leh chiboon ki kaam ha kini ki 25 tylli ki snem.
Chooh chooh e mynsien u ya ka seiñ wa ki dkhot ka Rotary Club Jowai waroh wow man kiwa pait rap cha jngai yei rukom krehkaam ka seiñ katkam i yah ka juk ka por kat hadooh wow kynjooh ko yow Moomer wa 50 tylli ki snem, wei iwa kyrpang kyrsu kyntu u ya ki dkhot ka Rotary Club Jowai wow man kiwa yatoh yumut wei pynkyrpang yei por wow yachem yachong pyrkhat ya ki waboon ki kaam kiwa dawa ya ka seiñ u leh ko neibynta ka chnong Jowai wa ha kiwi ki chnong ki thaw yong ka District.
Khaddooh da pynchongchit ya kani ka sngi pynkut yei lehkmen Silver Jubilee Celebration yong ka Rotary Club Jowai deiwa yoh yei rwai wa ki chaad wada yachimbynta da ki Rotractor wa ki khon khynroo khyllood ka Seiñraij Jowai.
