Ka Meghalaya Bharat Scouts & Guides kam chibynta i dap 50 snem yong ka jylla, da pynman ko yaka Training Basic Course yow e sikai ya ki Scoutmaster kawa da pynman nadooh ka 19 tarik hadooh ka 25 tarik uni u bnai ha State Headquarter yong ka kawa em hajan ka Pine Mount School, Shillong.
Ha kani ka Training Course da wan chah sikai kamwa 103 ngut kiwa sikai neibynta wow e myntoi kamjooh wow kyntu yaki khynnah skur hei puræ puthi wa yaki khynroo khyllood yow im bha im miat ki. Ya kini kiwai chah sikai da jied kyrpang wei da phah lyngba ka Sub-Divisional School Education Officer naki skur waphær waphær naki District waphær waphær kam na West Jaiñtia Hills, East Jaiñtia Hills, East Khasi Hills, Eastern West Khasi Hills, West Khasi Hills wa na Ri-Bhoi District.
Chwa wow sdang kani ka Training da pynlai yaka yalang wa tbian da u Aidor Ryngksai uwa man u State Training Commissioner wei heijooh i por da yoh yei klam na u kongsan, u W. Lyngdoh wow e mynsien uwa man leh u State Secretary ka Meghalaya Bharat Scouts & Guides hei ya emlang kiwa sikai wa kiwa chah sikai. Hei klam yong oo, da e u i yaroh neibhah toh ka sien wa nyngkong wa poi palat yaka chispah ngut kiwa chah sikai. Da e u leh ki kyntien e mynsien wow pynchlur ya kiwa chah sikai wow man kam kiwa yahkhmat khnang yow ye u e kawa bha tam yaki khynnah skur kamjooh yaki khynroo khyllood hawa im ki. I thmu wa kongsan hi toh manda pyndep ya kani ka chah e sikai toh u pyrchang wow wai chnat (Unit) deiwa ya krehlang ka skur hi waroh kawi.
Ha kani ka e sikai da pynyoo boon jait kam ki Tying of Knot, Spare Time Activities, First Aid, Flag Procedure, Wood Craft Signs, Hiking & Camping, Preparation Grand Camp Fire, Entertainment wa kiwi kiwi.
Chwa wow poi cha wakut, waroh kiwa chah sikai da chim smai ki wow man kam ki Scoutmaster hei ya emlang u kongsan, u P. Rynksai uwa da chong ngiah kam u Addl. Director School Education and Literacy wei man u leh kam u State Treasurer ka MBSG, ka K. Kharkongor kawa man kam ka State Commissioner Scouts.
Hadien ini da saam Certificate cha waroh ki Scoutmaster wa ki Lady Scoutmaster.
