Ka 1st Sumer Got Talent dapoi ko cha ka sngi pynkut ynnin ka 13 tarik i janmiet kawa da pymna ha yung dorbar ka chnong Samasi, Sumer Elaka, East Jaintia Hills kawa da pynman da ka Sumer Socio Cultural Sports Education and Entertainment Development Society hei ya krehlang waka Ams Entrepreneur Multipurpose Co-operative Society Ltd.
Ha kani ka sngi, u Defender Pakem da man u kam u kongsan katwa u Ready Salahe kam u symbood kongsan.
Da emlang leh u Albinus Lamurong uwa da kyntu ya ki khynnah u man ki kiwa kreh chitom khnang yoh u poi ki cha ka thong wei daw em leh kiwa jop wa kiwa rem, kamtæ da kyntu u ya kiwa poi cha ka thong wym hoi u em i mynsien wa sñiaw sarong wei kiwa rem leh wym hoi u sñiaw yaamrem wei wow man kiwa minot wei kreh chitom yow yoh u poi che jop ha kiwi tawan ki rynsan yakob.
Da yaroh u leh ya ka SSCSEEDS waka Ams EMCSL yei stat ki u pyrkhat wow pynmih ya kam kini ki jait yakob wow pynyoo yei sap i phong khamtam ya ki khon ka Elaka Sumer, da ong chooh chooh wa ini da pynyoo wa boon ki khon ka Elaka kiwa stat u chaad wa kiwa bang u rdang hawa rwai wa siaw, da kyntu u leh ya ki ar Society wow man ki kiwa nehchah kiwa maya hawa pynku ya ki sap ki phong ki khon ka Elaka.
Ha kani ka sngi pynkut da em 11 ngut kiwa da yoh u psiah cha ka Final heiwa yei naam jop da rah da ka Phibia Paslein, ka khon u Jambor Langstang waka Sarbina Paslein kawa na chnong Lakasein, da bood ryngkhi hei wa ar da u Serial Syrti, u khon ka (L) Ki Syrti wa u (L) Khram Chyrmang na ka chnong Jalaphet Bri Sumer.
Yei wa le won da yoh da u Phimost Chyrmang, khon u Kolet Dkhar waka (L) Lem Chyrmang uwa naka chnong Jalaphet Bri Sumer katwa hei wa soo da rah da u Klossik Lamurong, khon u Lena Sharai waka Poipyrkhatbha Lamurong uwa naka chnong Mookhain.
Da pynkut ya ka yalang da ki klam e khublei na u Begin LS Paslein uwa man leh kam u President wa u Amnesty Salahe wa man leh u Secretary.
