Chandigarh: Ka 5th Edition of North East Youth Fest (NEYF), Chandigarh da poi noh ko chawa kut ynnin ka 13 tarik heiwa u Manoj Parida IAS, Advisor to the Governor of Pubjab and Administrator of Chandigarh da ekhublei u ya kiwa pynman ya ka hajrong ka phang “Peaceful India, Prosperous India”.
U Parida da kyntu u ya ki khynroo khyllood ka thaaiñ mihsngi wow sñiawsarong ki yei man i long wa hok wei wa chida yong ki. Da pynsñiaw u leh yei mynsien wa kmen wa da embynta u ha kani ka tamasa deiwa kynmoo tamdien leh ya ki por wa dang kreh u ha jylla Arunachal Pradesh.
Ha kani ka tamasa da wan chimbynta da palat 1800 ngut na ka thaaiñ mihsngi heiwa da yaklam hajrong ki phang kam i chongsuk, i yatylli hapoh ka ri, i kaamram yong ki bru samen, i rukom im ha ki sorbah, ki Social Media wa kiwi kiwi.
Neiliang kiwa chimbynta da pynyoo ki ya ki chaad wa ki rwai wa i pynyoo rong ya ki sula tynre wa i mahajon ka thaaiñ.
Ha ka bynta wow phyllu yumut, ka Vina Arora, kawa man ka diah u montri rangbah ka Haryana kawa man leh ka Brand Ambassador yong ka Betti Pattao, Betti Bachao neibynta ka Punjab wa Haryana da pynsñiaw ko yei mynsien wa kmen wow embynta ha kani ka tamasa khamtam wow yoh u yaklam wa ki khynroo khyllood ka thaaiñ mihsngi.
Da kyntu ko ya waroh wow yaleh u wanrah yei chongsuk wa i roi i paar, wei wow burom kylliang iwi ya iwi wei wow krehlang chirup wa u montri rangbah dooh ka ri, u Narendra Modi wow pynku kyrdan ya ka India wei wow wanrah yei chongsuk. Da kyrmen ko leh wa ka rai ka Supreme Court hajrong ka Ram Janam Bhoomi u wanrah ko yei chongsuk ha ka thaaiñ wei i yatylli kmjooh i maya lok.
U Don Bosco Navjeevan, Chandigarh, Director, wa u Organizing Secretary ka NEYF, Fr. Reji Tom, da pynsñiaw u yei mynsien wa kmen hajrong i wan chimbynta ki khynroo khyllood ka thaaiñ ha kani ka tamasa ha Chandigarh.
Ka Shilpa Das da kyrpaad ko ya ka NEYF wow chimbynta ha ka Chandigarh Urban Festival kawa da man la le snem kattu wow wanrah yei yatylli. U Basanta Raj Kumar, uwa man u sahep IFS na Manipur, da e buit u ya ki khynroo khyllood ka thaaiñ wow sñiaw sarong ki yei man kyrpang i rukom im ki jaitbru ka thaaiñ wei wow yaleh u pynneh ya ki.
Neiliang u Fr. Cyriac, Director, Don Bosco Youth Centre, Itanagar uwa man u Organizing Chairman ka NEYF da ekhublei u ya kiwa yahkhmat yong ki phra tylli ki jylla ka thaaiñ mihsngi kiwa da wan hapoh i yahluti u Fr. Regi wa Caryn, Coordinator NEYF wow embynta ha kani ka tamasa.
Da ekhublei u leh ya u montri rangbah ka Arunachal Pradesh, u Pema Khandu, uwa da kyrchaan bait ya kani ka tamasa.
U Organizing Chairman da ekhublei u leh ya u Mama Natung, u montri ka Arunachal Pradesh wa pait ya ka Youth Affairs and Sports wa u Nabam Tuki, uwa man u montri rangbah warim ka Arunachal Pradesh.
Da yoh ya ki kyntien ekhublei na ka Bharti Yumnanm na Manipur heiwa da ekhublei ya u Pema Khandu, u Nabam Tuki, MLA ka Arunachal Pradesh wa kiwi kiwi.
Kani ka tamasa toh kawa ebuit da ka Don Bosco Youth Centre, Itanagar wa ka Don Bosco Navjeevan Society, Chandigarh hajrong ka thong wa tip kam ka Fest be Educative, Entertaining & Morally Good wow pynyoo yei mahajon ka thaaiñ mihsngi.
Discussion about this post