Ka Iawpynsing Welfare Club (IWC) League Season 2 wa pynman da ka Sports Committee ka Iawpynsing Welfare Club, Rymbai East Jaintia Hills, da poi ko cha wa kut ynnin i miet ka 5 tarik da ki yalehke hapyrdi ka Team Dragon waka Team Wolf kawa da pynman ha madan bol ka Iawpynsing.
Ha kani ka yalehke ka Team Wolf da jop ko ya ka Team Dragon da 1-0 yow man kam ki Champion ka IWC League Season 2.
Kani ka lympung toh kawa da sdang ha ka 01-10-21 wei da wan chimbynta da 6 tylli ki Team heiwa ya ki yalehke da pynman hei miet.
Ha kani ka yakhun Final da emlang u Nidamon Chullet, Working President ka National People’s Party, Jaintia Hills kam u kongsan deiwa emlang u Finelyness Bareh, MDC Khliehriat-Rymbai, u Tuesday Lytep, Waheh Chnong ka Shangpung Khliehmynshut, u Devender Bansal, Resident Director Star Cement wa kiwi de.
Neiliang u kongsan hawa e yei klam da ong u, “Ki khynroo toh u chim ki ya ka yalehbol kam ka laad kamai neibhah kani da man ko kam ka karkhana e kreh ya ki khynroo”. Da ong u leh wa ki khynroo toh u ya chimbynta bha ki ha ki yalehke Sports yow man ki kiwa chait wa khiah wei yow lait na kiwon kiwon ki kaam wa sih wa ktah ya ka imlang sahlang.
Ya kani ka IWC League da pynman yow wanrah yei yatylli wei yow man kam chi payu para hapoh ka dong. Ka Club da ong ko leh wa deiwa pynman ya kam kani ka League daw yarap wow seiñ dur yei pynkhreh wow man kam kiwa yalehbol heijooh i por yow ye u yait na ki kaam wa man pyrchah ya ka imlang sahlang.
