Ka lehniam Durga Puja yong kiwa ngait niam Hindu ha Jowai dapoi ko ka cha wakut ynne da ka Vijaya Dashami heiwa da pynngam um lut ya ki Blai ha Pohkhyllem iwa man i bynta yong ka wah Myntdu ha Jowai.
Ya ini i pynngam um da wan sakhi ki paidbah na kylleiñ ka Jowai hei emlang ki bor pulit wa ki bor District.
Kiwa ngait niam chynrang wa kynthai, waheh wa khynnah da chaad ki tymbud luti hei kieh i sur, ki bom wa kiwi kiwi nadooh na Iawmusiang hadooh wa poi ha Pohkhyllem.
Mar ya sdang i pynngam um ya ki Blai da joo u slap heiwa da ngait wa i hiar slap wanrah i ya i bha i miat ha ka imlang sahlang.
Neiliang u President ka Sarbajanin Durga Puja Committee, u Soumitra Chakravarty da ong u wa i pynngam um toh deiwa yada ya ka mariang namo ka Green Immersion iwa da leh la kamwa san snem ha Jowai kattu katkam ki hukum wa ki kyndon ka NGT.
Da ong u wa ki rong kiwa da pynemkaam leh ymtoh ki wow ktah ya ka um wei wa da pynlang ya iwa da pynngam chi thaw don khnang wow ye won wow kyrriah ya ki na ka um hadien.
Chooh chooh da ong u wa heipor wa pynngam um ya ki Blai da hiar u slap wei ini man i i dak yong i bha i miat wa bha katkam i ngait niam yong ki.
Discussion about this post