Jowai: Ka lympung yalehke Football wa tip kam ka Mission Football Tournament wa pynlai da ka yung krehkaam u District Sport Officer ha ki le tylli ki Block ka West Jaiñtia Hills District wa kynthup ya ka Jowai Zone haka kyrdan Under-15, Under-18 kynthai wa chynrang, ynne ka sngi da poi noh ko cha wa kut lyngba ka yakhun final yong ka Jowai Zone ha Madan Stadium Ladthadlaboh, Jowai.
Ha ka yakhun Jowai Zone yong ka kyrdan Under-15 Girls da jop da ka North Liberty Higher Secondary School, ha ka Under-15 Boys da jop ka Chilliangraij, haka Under-18 Boys da jop ka North Liberty Higher Secondary School katwa haka Under-18 Girls ka Khimmusniang Sport Club da yoh bait ko wow paiah cha ka District Level neibhah ym em wa yakhun pyrchah ya ka.
Ya ki khusnaam cha kiwa jop ha ka Jowai zone da saam da u W. Marbaniang, District Agriculture Officer, Jowai, u Patrick Lamare, Vice President WJDSA, u Nangebor Suting, Sports Secretary ka WJDSA hei emlang u District Sport Officer, u S.H.Shangpliang wa kiwi kiwi.
Hawa kyruiñ cha ka Thadlaskein Block ha ka kyrdan Under-15 Girls ka Little Flower Higher Secondary School Ummulong da rah ko yei naam jop, ha ka Under-15 Boys leh da jop ka Little Flower Higher Secondary, haka Under-18 Girls da jop ka Mookyndur Sport Club katwa haka Under-18 Boys da jop ka Lurshai Lyrnai Sport Club.
Ha Amlarem Block ha ka kyrdan Under-15 Girls da jop ka Riwar Jaiñtia Church of God Secondary School, ha ka Under-15 Boys da jop ka Padu Secondary School, ha ka Under-18 Girls da jop ka Laishnong Higher Secondary School Nongbareh katwa haka Under-18 Boys da jop ka Mang Hai Ryum Higher Secondary School, Amlarem.
Man i leh iwa sñiaw sarong ya ka skur St. Dominic Higher Secondary Mookyndeng heiwa hapoh ka Laskein Block da yoh lut ko yei naam jop ha waroh soo tylli ki kyrdan nadooh ka Under-15 Girls, 15-Boys, Under-18 Girls wa ka Under 18 Boys.
Ki dhab wa jop ha ki Block waphær waphær wa kynthup ya ka Jowai Zone daw yoh ki wow mihkhmat won ha ka lympung wow yakhun ha ka District Level ka wow man ha ka 30 wa 31 tarik uni u bnai.
Discussion about this post