Ka lympung yalehke wa tip kam ka 9th U Kiang Nangbah Inter Office Badminton & Carrom Board yong ki chnat krehkaam sorkar waphær waphær wada pynman daka Meghalaya State Government Employees Federation, Jaiñtia Hills Unit, Jowai dapoi ko chawa kut ynnin i janmiet ha Indoor Hall ka Seiñraij Jowai ha Tpep Pale, heiwa yei naam jop yong ka Badminton Men’s Double da jop daka PHE, haka Men’s Single da jop daka DM&HO, katwa haka Carrom Board won da jop daka Kiang Nangbah Govt. College.
Haka Badminton Men’s Single ka DM&HO wa mihkhmat da u Dr. Peterson L Lamare da jop ko yaka chnat PWD wa mihkhmat u Dauru Laloo da 16-21, 21-10, 21-17.
Haka Badminton Men’s Double, ka PHE wa mihkhmat da u Inar Kyndiah wa u Roskil Challam da jop ki yaka chnat DM&HO wa mihkhmat u Dr. Peterson L Lamare wa u Rimilan Passah da 21-19, 16-21, 21-17.
Haka Carrom Board Men’s Double won da jop daka Kiang Nangbah Govt. College Jowai wa mihkhmat da u Satisfyme Dkhar wa u Bashanbor Dkhar deiwa jop yaka DIPR wa mihkhmat u Holywell Dhar wa u George Hamilton Kungle.
Ha kani ka janmiet u D. Pyrbot, District Agriculture Officer, West Jaiñtia Hills hei klam yong oo kam u kongsan da pynsñiaw u i sñiawngooh yaka Federation ki wakreh sorkar, wei e yaroh u leh yaki chnat krehkaam waphær kiwa da chimbynta.
Da ong u wa i chimbynta ha kam ka yalehke Badminton wym mut du u yakhun yei jop tangwa wanrah ko leh i chait i khiah ya kiwa chimbynta haki yalehke waphær waphær.
