Jowai : Ka 3rd Inter School Chess Tournament 2017 kawa da pynman da ka Jaintia Hills District Chess Association (JHDCA) nadooh ka 27 tarik da poi ko chawa kut ynne ka janmiet yong ka 29 Wisu 2017.
Ya kani ka lympung yakop lehke Chess da pynman ha Thomas Jones Synod College Jowai.
Da wan chimbynta da ka Government Senior Basic School, Marian Hills Higher Secondary School, ka North Liberty Higher Secondary School, ka St. Mary Mazarello Higher Secondary School heiwa da wan chimbynta hadooh 13 ngut ki khynnah.
Da yabhah ya ka yakop ha ki ar bynta ka Junior hadooh class 8 wa ka senior nadooh class 9 hadooh class 12.
Ha ka yakhun Final ki Junior Boys da jop u Daekyrpangmitre Pyrngap na North Liberty HSS uwa da pynrem ya u Damihmi Shylla na ka Government Senior Basic School.
Ha ka Girls Category da yakun Final ki chi payu heiwa da jop da ka Sumon Lamare ya ka Angelina Lamare wei pyn ar kini toh kiwa na ka Government Senior Basic School.
Ha ka Senior won da jop u Da-e-kynsaimitre Pyrngap na ka North Liberty uwa da pynrem ya u Frankincense Manners na ka Marian Hills HSS.
Ha ka yalang saam prize cha kiwa jop da em ka yalang wa tbian kawa da pyllai da u P. Lyngdoh uwa man leh u president ka JHDCA heiwa u DC ka West Jaiñtia u R. Rapthap da man u kam u kongsan.
Da yoh i klam na u Vice Principal ka College u H. Nongpluh,
Kam u Kongsan u Rapthap da da e khublei u ya ka seiñ kawa da ye u pyllai ya kani ka lympung yalehke.
Da ong u leh wa sñiawkmen u wa cha ri-loom Jaiñtia em boon ki seiñ ki wow kyntu kynrong ya i sap ki khynroo khyllood nadooh dang khian ki.
Discussion about this post