Ka lehwarom ya ka Poshan Pakhwada hapoh ka thong ‘Integration of traditional and modern practices for healthy India’ da poi ko chawa kut ynne ka sngi ha Byndihati, Dong Umsngad Community Hall, East Jaiñtia Hills District ya kawa da pynman da ka yung krehkaam ka District Programme Officer, ICDS (CELL), East Jaiñtia Hills District, Khliehriat heiwa u Kyrmen Shylla, u Montri ka chnat bhalang ka jylla da man u kam u kongsan.
Ha kani ka sngi neiliang u Kyrmen Shylla da ban joor u yei emkaam ki khynnah yei chait i khiah khnang wow heh wow san ki, deiwa pynrap wa kiwa kreh ICDS wa Anganwadi man ki ka bynta wa kongsan tam wow pyntikna wa biang i rukom baam ki khynnah.
Neiliang u Montri da khana u kajiak hajrong ka Early Childhood Development Mission (ECDM) yong ka chnat Social Welfare Department wa ki thong yong ka wow wanrah ya i biang ki baam wa tei, i chait i khiah, i puræ puthi wa kiwi kiwi.
Kiwi kiwa da e i klam ha kani ka yalang kynthup ki ya ka F. Wann, ka EAC, East Jaiñtia Hills District, Khliehriat; ka R. Bareh, CDPO, ICDS Saipung Project wa kiwi kiwi.
Neiliang u Kyrmen Shylla da wai u ya ka Anganwadi Centre ha Byndihati, Dong Umsngad ya kawa da chna da ka National Bank for Agriculture and Rural Development (NABARD) ha u snem 2020-2021.
Da pynyoo leh ya ki jait baam wa emkaam ha kani ka sngi da ki Anganwadi na Sohkymphor, da e yei rwai na ki Anganwadi ka Byndihati wa kamjooh leh na kiwi ki dkhot ki SHG.
Ya kani ka yalang da wan sakhi leh da u Dr. Dominic Shylla, District Medical and Health Officer, East Jaiñtia Hills District; u T. Shylla, Block Development Officer, Wapung C&RD Block, ka R. Passah, District Social Welfare Officer, East Jaiñtia Hills District; u T. Kyndiah, District Child Protect Officer, East Jaiñtia Hills District; u W. Buam, District Coordinator (Swachh Bharat Mission); ka Y. Najiar, District Programme Officer, ICDS, Poshan Abhiyan, East Jaiñtia Hills District wa ka C. Pale, CDPO, Khliehriat Project.
