Ka Reserve Bank of India (RBI), Shillong da pynkut ko ya ka State Level Round ka “All India Quiz on Financial Literacy 2023” ha ka 10 tarik uni u bnai ha Hotel Vivanta Shillong. Ha ki ar bnai chwa, ka RBI Shillong da pynman ko ya ki yakob Quiz ha kylleiñ ki Block wa ki District ka jylla wei hawa khaddooh da jied ya 9 tylli ki skur wa mihkhmat ya ki District wow yakhun ya kani ka State Level Round.
Ya kani ka Sate Level Round da wan wai da u Olden Nongpluh, General Manager, Officer-in-Charge, RBI-Shillong deiwa sakhi lang u Pravin Bakshi, IAS, Commissioner & Secretary, Education Department, ka sorkar Meghalaya kam u kongsan.
Ya kani ka Quiz da pynman kam chibynta wow pynchlur yow tip ya ki kaam poisa poilaiñ khamtam ya ki khynnah skur yow man ka ri kawa pliah yow lait u sahdien hei rukom pynlai wei pynemkaam poisa yow man ka India kawa da stat da che.
Ki thup yukylli hapoh kani ka Quiz toh kiwa yatoh waka jylla Meghalaya, ka RBI, Banking/Financial Sector, Indian Economy wa kynthup ya ka G20.
Ka skur wa yoh nyngkong toh ka Kendriya Vidyalaya, Happy Valley, Shillong hei wa ar da yoh ka Tura Public School, Tura wei hei wa le won da yoh ka Mawrong RMSA Secondary School, Ri-Bhoi.
Kiwa yoh nyngkong da yoh ki T. 20,000, kiwa yoh wa ar T. 15,000 wei kiwa yoh wa le won da yoh ki T. 10,000 deilang ki Trophy wa ki Certificate. Chooh chooh kiwa chimbynta da yoh ki leh ya ki tiar ki tar na ka G20 deilang wa ki Certificate wa chimbynta ki.
Ka skur wa jop kattu daw mihkhmat ko ya ka jylla ha ka Zonal Level Quiz.
Discussion about this post