Jowai: Ka Sate Biennial Conference kiwa kreh Nurse wa ar sngi wa pynman da ka Trained Nurses Association of India, Meghalaya State Branch da poi ko chawa kut ynne ka sngi ha District Library Auditorium, Mynthong, Jowai.
Ha kini ki ar sngi da pynman ya ka phyllu yumut heiwa ki Nurse da yoh ki wow pynsñiaw yeiwa chem ki wa ki buit heiyatoh wa i man kam ki Nurse, da yoh leh ya ka Scientific Paper Presentation na ka B. Kharshiing, Chairperson, Nursing Education, TNAI, Meghalaya State Branch, wei da saam leh ya ki khusnaam.
Ka Ivory Kharduit, President ka Trained Nurses Association of India (TNAI) Meghalaya State Branch da ong ko wa i thmu wow pynman ya kani ka Conference toh yow ye u wanrah lang ya ki Nurse ha kawi ka rynsan yow yoh ki u pynsñiaw ya ki buit ki budia kamjooh yow wanrah ya i sñiaw yajan ya ki Nurse kiwa wan na kylleiñ ka jylla.
Da ong ko leh wa ha ri-loom Jaiñtia hanlada em du kawi ka Nursing School wa pynlai da ka Dr. Norman Tunnel Hospital da boon ki Nurse wa pynmih kani ka thaw puræ wei da yooluti ko wa ka sorkar daw chna Nursing School ko yow ye u yarap ya kiwa kwah u man Nurse napoh ri loom Jaiñtia yow lait ki u haap mih napoh ka District yow lai puræ Nurse. Da pynchlur ko leh ya kiwa kreh Nurse wow pteiñ ki u maya ya i kaam yong ki, wow e ya i chakri wa paka hawa sumaar ya kiwa kjut kiwa chitom.
Ha kani ka sngi da saam leh ya ki khusnaam chwa kiwa jop pynyoo rong ya ki syntu kawa da jop da ka Dr. Norman Tunnel Hospital, Jowai wei da yoh ko leh ya ka i kyrdan wa le ha ka yakob wow chna ya ki tiar ki tar da ki mar wa dadep pynemkaam, ka Jowai Civil Hospital (Blood Bank) da yoh First Prize ko ha kani ka kyrdan katwa ka Civil Hospital Shillong da yoh Second Prize ko ha i pynyoo rong syntu wa ha i chna mar da ki tiar ki tar wa dadep pynemkaam wei ka Tura Civil Hospital da yoh Third Prize ko ha ka pynyoo rong syntu.
Discussion about this post