Poi ka tamasa Tura Winter Youth Festival wa le sngi cha wakut

Tura: Ka tamasa lehkmen wa le sngi wa tip kam ka Tura Winter Youth Festival wa pynman da ka yungkrehkaam ka West Garo Hills District Administration da pynman ya ka ha Dikki-Bandi Stadium, Dakopgre wei da pynkut ya ka ynne ka janmiet da ki put ki tem da ki dhab tem.

U Montri Rangbah ka jylla u Dr. Mukul Sangma da wan sakhi u ya kani ka tamasa heiwa oo leh da chim bynta u ha ka rynsan chirup wa ki dhab kiwa put wa tem, wa kiwi kiwi.

U Dr. Mukul hei klam yong oo da ong u wa ka sorkar jylla pyllut ko chiboon ha kam kini ki tamasa khnang wa ki khynroo khyllood u yoh elaad ki wow pynyoo ya ka sap yong ki heiwa da kyntu u ya waroh wow ya chimbynta ki ha kam kini ki tamasa.

Da pynksan u yei man kongsan ka put ka tem katni neibhah wa yarap ko wow pynyoh yei doh i pran iwa chait wa khiah.

Heijooh i por da ong u wa hanlada man u uwa boonkaam, oo yohbor u na ki rwai ki siaw ki put ki tem manda lai u cha ki. Da kyntu u leh ya ki sahep wa emkaam u yakrehlang wa ki DC yow pynman ya ki kaam wow wanrah yei chait i khiah kam ki lai kjat, i yah bicycle, wa kiwi kiwi.

Ha kini ki le sngi da em leh ka yakop chondur da ki mobile phone, i yakop rwai Karaoke, i pynyoo baiskoop, wa i pynyoo rong ya ki mar da ki tnat sorkar, ki seiñ kreh monsñiawbha, wa kiwi kiwi.