Ka lehkmen wa tip kam ka 75th Independence Day Week Celebration 2021 yong ka ka Meghalaya Bharat Scouts & Guides West Jaiñtia Hills District kawa sdang nadooh ka 12 tarik da pynkut ya ka ynnin ka sngi 16 tarik.
Ha kani ka sngi da pynman leh ya ka Cooking Competition yong ki Rovers & Rangers heiwa da em ka yalang wa tbian ya kawa da wan pynhiar pyrda da u L. Lyngdoh, Jt. Director DSEL, Jowai kam u kongsan hei emlang ka Saramai Tariang, District Commissioner, Guides West Jaiñtia Hills wa man kam ka Chairperson, u Ohiwot Laloo, District Secretary MBS&G West Jaiñtia Hills kam u symbood kongsan, u Adiam u Bthuh, Jt. District Secretary MBS&G West Jaiñtia Hills wa ki Scouts Master, Guides Captain, Rovers & Rangers wa ka Ranger Leader.
Ha kani ka yalang wa tbian yong kani ka sngi da yoh ki kyntien yahkhmat ka Rosie Bang, Ranger Leader yong ka Thomas Jones Synod College, wei ya ka Report yong ka lehkmen wa chi tayaw da e da u Adiam u Bthuh, heiwa da pynbna u ya ki pyrtuid kiwa jop ha ki yakob waphær waphær wada leh waroh chitayaw.
U L. Lyngdoh, hawa e yei klam ha kani ka sngi da yaroh u ya ki bor pynlai ka Meghalaya Bharat Scouts & Guides, West Jaiñtia Hills wei ini pynyoo ko wa hapyrdi i tynjooh yong kani ka khlam, ki khynnah Scouts-Guides hapoh ka District yohlaad ki u pynyoo pyntaw jiar ki sap yong ki.
Da klam u leh hajrong ka Waste Management kawa emkaam hapoh Jowai wei kyntu u ya ki wow lai pynsñiawthooh chaphang kani ka phang ha waroh ki dong ki chnat yong ka sor Jowai wei daw yaleh chitom u wow e yarap na ka chnat wa pait u wei daw yaklam u wa ki bor District wow yarap ya ka seiñ.
U Ohiwot Laloo, da e khublei u ya ka Programme Committee wa da pynman ko ya kani ka yalang deiwa kular wow chimkhia hajrong i tyrwa u kongsan wow pynman ya ki pynsñiawthooh paidbah hajrong ki phang wa emkaam.
Heijooh i por da yaroh u ya ki Unit Leader wa da kreh chitom ki ha kiwon kiwon ki bynta wa da phah ya ki.
Hawa kut yong ka yalang neiliang ka Siami Shylla, da e ko ya ki kyntien khublei.
