Umkiang : Ka Wildlife Week kawa da pynman ha kylleiñ ki thaw hapoh Jaintia Hills da poi ko chawa kut ynne ka 28 u Naichiphaw ha Holy Cross Higher Secondary School, Umkiang ha ka yalang Valedictory Function. Ka matphang yong kani ka tayaw ha uni u snem man ko “Living with Wildlife” iwa mut u im chirup wa ki mrad khloo.
Ha kani ka yalang pynkut u Addl. PCCF (Admin.) u BK Lyngwa da man u kam u Kongsan katwa u Addl. PCCF (Wildlife) won u ma Y. S. Shullai IFS, APCCF da man u kam u Symbood Kongsan. Ya kani ka yalang da pyllai da u District Forest Officer (T) u T Kharluki u wa man kam u Chongknor.
Ha kani ka yalang da yoh yei kyntien pdiang burom na u Principal, Holy Cross Higher Secondary School, Umkiang u Fr. Arun.
Da yoh yei klam na u waheh chnong ka chnong Umkiang, u ma Silent Sailo da kyntu u yei kaamram ki khynnah skur wow pynsniawthooh ya kiwi wa emkaam u pynneh ya ki mrad khloo.
U DFO (Training) u ma J.M. Pohsngap hei klam yong oo da ong u wa ye i u sai ya u bru na ki khloo tangwa ym ye i u sai ya ka khloo na u bru wei kyntu u wow pynneh pynsah ya ki mrad khloo.
U Addl. PCCF (Wildlife), u ma Y.S. Shullai hei klam yong oo da ong u wa ka Meghalaya man ko kam kawi na ki Biodiversity Hotspots hapoh ka India, neibhah wa neidaw man ko ka thaw wa em ki mrad hei ma wa khroo.
Addl. PCCF (Admin.) u BK Lyngwa kam u Kongsan da ong u wa i man i kam chibynta yong ka rymaw tæ haap burom i yeitæ. Ka wildlife week celebration da pynman ym du heini tangwa ha kyllaiñ ka ri India.
Da yoh leh ya ka PPT Presentation na ka DFO (Wildlife), ka kong H. Lato heiwa da pynyoo dur wei da batai ko yei myntoi wa i emkaam wow pynneh ya ki mrad khloo.
Ha kani ka sngi da saam khusnaam cha ki khynnah kiwa da jop ha ki yakop wapher wapher. Heijooh i por da e sñiawbha leh ya ki momentous cha ki bru samen wa ki seiñ kiwa da yarap pynlait ya ki mrad khloo ha ki 12 kynti uni u snem ha kylleiñ ka ri loom Jaintia.
Discussion about this post