Jowai : Ka lympung yalehke Football U-16 kawa da tip kam ka 2nd Independence Day Cup kawa da pynman da ka WJDSA ha Kiang Nangbah Stadium da poi ko chawa kut ynne ka sngi.
Ya ka yakhun wa khaddooh da yaleh hapyrdi ka Dulong wa ka Lumpariat.
Ka yakhun man ko kawa yoosuk heiwa pyn ar ki dhab da pynyoo ki jar jiar i sap yong ki wei ha ka minit wa 13 ka Lumpariat da yoh ko u chut Penalty heiwa da chut da u Wandame Lamare kawa da psiah klak hapoh kool.
Hadooh wa kut ka yaleh kylla step ka kool da neh ko kamjooh, ki paidbah na pyn ar ki dhab da kyr-iaw ki ya ki wa yalehke ki kam wow e mynsien ya ki.
Ha ka kylla meit ha ka minit wa 53 u Sunidonhi Suchiang yong ka Lumpariat da thap u ya ka kool wa ar wei da yoh biang ko u thap ya ka kool wa le lyngba u Riki Dhar ha ka minit wa 67.
Hawa kut ka yaleh ka Dulong ym ye ko u thap chi kool leh, wei ka Lumpariat da jop ko da 3-0 wei da rah ko yei naam Champion ka 2nd Independence Day Cup ha uni u snem.
Ya kani ka yakhun da wan sakhi da ki spah ngut wei da em leh u ADM ka WJH u ma D.M. Wallang kam u kongsan, hei emlang u Working President ka WJDSA u ma EMH Passah wa kiwi kiwi.
Ha kani ka sngi da pynkup burom leh ta ki le ngut ki coach kiwa e sikai ya ki khynnah wow yaleh ball.
Da pynkup burom leh ya ki wa yalehke U-12 na ka District kiwa da jop ha ka yakhun State Level Under 12 Football Tournament kawa da pynman da ka Meghalaya Football Tournament ha u Duyatra ha Shillong.
Hei yatoh wa kani ka lympung yalehke U 16 da e yei naam Best Goalkeeper cha u Rickyson Roy Lyngdoh yong ka Lumpariat u Top Scorer da jop da u Wansa oo Laloo na ka Dulong SC, yei naam Man of the Match da yoh da u Wandame Lamare yong ka Lumpariat katwa yei naam Player of the tournament da yoh da u Arwanki Dkhar yong ka Khliehiongriang SC
Kiwa jop chirup wa ki Trophy da yoh ki T. 20,000 katwa kawa rem won da yoh ko T. 10,000.
Discussion about this post