Jowai : Kamwa jooh leh man u snem, ka Govt. Girl’s Higher Secondary Jowai, da pynman ko ya ka Inter House Sports Meet ha ki ar sngi ka 23 wa 24 tarik ha madan Jrisaleiñ, Chutwakhu.
Ha kani ka Sport Meet da pynman ha ka kyrdan Junior, Senior da ki yalehke waphær waphær kam ka phet 100 meter, 200 meter, 400 meter, 1600 meter, ka High Jump, Long Jump wa kiwi kiwi.
Ya kani ka Sports Meet da pynkut ynne ka 24 tarik hei wan emlang ka kong M. Pde, District School Education Officer kam ka kongsan hei emlang ki wa sikai wa kiwi.
Ka kong M. Pde hawa e yei klam da ong ko, hei lai luti kam ki khynnah skur emkaam leh u em chirup ka yalehke sport ymtoh du kat i puræ, neibhah ka kaam sport leh toh kawa emkaam u yoh, kamtæ kani toh ka laad ya ki khynnah skur u pynyoo yei sap yow ku ha waroh arliang nadooh i jabieñ wa i doh i pran.
Da ong ko leh wa lyngba i chimbynta ha ki kaam sport daw yoh yei chait i kmen ya kiwa jop wa kiwa rem leh kamjooh. Kamtæ da kyntu ko ya ki khynnah wow chimbynta ki ha kiwon kiwon i jait lehke wa pynman ka skur ya sihlet ki hadien.
Ha kani ka sngi ka kong M. Pde da saam ko leh ya ki khusnaam ‘Best Athlete’ yong ka Under 14 wa da yoh da ka Aelisha Lytan na ka Rose Group, haka Under 16 da yoh da ka Ewanjalin Sympli na ka Pancy Group.
Yei naam ‘Best Home’ da yoh da ka Pansy Group, yei naam ‘Best Discipline’ da yoh da ka Lily Group katwa yei naam ‘Best March Pass’ da yoh da ka Rose Group.
Discussion about this post