Jowai: Ha ka bui na ka sylli (Survey) wa pynmih ka Hotelivate dei yakrehlang waka World Travel and Tourism Council (WTTC) chirup waka Tourism Council-India Initiative (WTCC-II) ha u snem 2017 da chem wa ki jylla hapoh ka thaiñ mihsngi em ki cha tre dooh hapoh ka ri hanlada boon na ki chnong ki thaw yong ki man ki kiwa pawnaam.
Katkam kani ka sylli da chem wa ka Assam da yoh ko 5,160,599 ngut kiwa napoh ka ri wa hiar cha ka wei 12,685 ngut ki pharæng. Ha ini i jooh i por ka jylla Tamil Nadu da yoh ko 34,38,12,413 kiwa uiñ suwari kiwa napoh ka ri wa 47,21,978 ngut won ki pharæng.
Katwa ha Nagaland won da duna dooh kiwa uiñke suwari kiwa napoh ka ri heiwa da poi 58,178 ngut katwa ka Mizoram won da yoh ko kiwa duna dooh ki pharæng wa wan cha ka kiwa em du 942 ngut donhi.
Ha kani ka sylli wow jied ya ka jylla wa nyngkong dooh wa kawa kahddooh dooh toh katkam ki 11 tylli ki kyndon wa kynthup ya iwa pyllut ki sorkar jylla wow pynku ya kani ka kaam, i boon i wan kiwa uiñke suwari, i boon i em ki Hotel wa pawnaam, i yoh nong na ka kani ka kaam, i stat i tip ki tre chnong, i suk u poi da ka Airplane, i biang ki sarok, i biang ki rel wa kiwi kiwi.
Na ki 30 tylli ki jylla ka ri, ka Sikkim da booh ya ka ha ka kyrdan wa 22, ka Mizoram ha 23, Tripura 24, Assam 26, Nagaland 27, Manipur 28, Arunachal Pradesh 29 katwa ka Meghalaya won ha i khaddooh wa 30.
Da ong wa i daw ymtoh wa ym em biang ki chnong ki thaw, da ong wa i daw toh wa chitom u poi cha kiwa boon ki thaw wa em ha kini ki jylla iwa ktah yei lai i wan kiwa uiñke suwari kamjooh ki Hotel wa biang.
Hanlada kamtæ leh ka Assam da yoh ko yei naam “Best policy and leadership in tourism.”
Discussion about this post