Ha i miet 12 tarik uni u bnai, 13 tylli ki hati khloo wa kynthup ya kiwa heh wa kiwa dang khian da wanpoi ki ha ka chnong Daistong, East Jaiñtia Hills heiwa da pynjæd tympra ki ki ya ki mar rep ki bru.
Hawa yaklam wa u Secretary Chnong ka Daistong, u Vestperson Sutnga da ong u wa ki bru wakreh na ka chnat Forest da thoohlaad ki wow beh ya kini ki hati wei da yut ki du chibet chipor.
Da antaad wa kini ki hati da sah ki ha ki khloo Nongkhlieh Sumer wei wa da wan ki cheini na liang ka jylla Assam.
Kamtæ kiwa chong chnong da kyntu ki ya ki bor ka sorkar wow leh yeiwa emkaam hajrong ini waroh.
Hawa yaklam wa ka Divisional Forest Officer, Jaiñtia Hills Wildlife Division, ka H. Lato da ong ko wa kini ki Hati da wan ki na liang Assam wei katkam wa man katni dang em ki wakreh ka chnat ha kani ka thaw.
Heiyatoh wa i lutsan wa wanrah ki hati ya ki mar rep, da ong ko wa dang kheiñsap yeiwa da chah ktah wei daw e yarap cha ki warep wa da chah ktah heini.
