Ka seiñ kiwa kit phñiang kari, ka Assam Petroleum Mazdoor Union (APMU), ynnin da chim ki ya ka rai wow kit phñiang biang cha Meghalaya hadien wa da dam ki wow wan chi sngi deiwa khuslai wei artatien ki yei chngaaiñ i lai i wan ki dkhot ka seiñ kamjooh ki kari yong ki.
Da sangeh ki wow kit phñiang hadien wa da mih ki huri-hura hapoh ka jylla Meghalaya hadien wa chah siatyap 6 ngut ki bru ha ki pulit ka Assam ha chnong Mukroh, West Jaiñtia Hills.
U General Secretary ka AMPU, u Ramen Das da pyntip u neiliang ka sorkar Meghalaya da kular ko wow e yei yada ya kiwa yah kari kamjooh kiwa wa embynta u kit phñiang tangwa da ong u wa lada em iwon iwon i jia daw sangeh ki u kit phñiang.
Sa kiwi ki kyndon toh wa ki truck ym lai luti ki hadien wa sep sngi hadooh wym pu man biang kam nachwa i long i man hapoh Meghalaya wei ym chah leh wow neh miet ki kari hapoh Meghalaya.
Da pyntip u leh wa da dep wow phah 7 tylli ki Truck Tanker na HPCL Betkuchi Depot wa em ha Guwahati.
Chooh chooh ka Petroleum Dealers Association, Meghalaya (PDAM) leh da kular ko yei krehkaam lang yow pyntikna wa lai bait i pynpoi phñiang hapoh ka jylla.
Neiliang u Montri Rangbah ka jylla Meghalaya, u Conrad Sangma leh da ong u wa ym em duna phñiang kari hapoh ka jylla wei da kyntu u leh ya ki paidbah wym toh u hær-rgnu ki u yaknieh thied phñiang.
