Ynne ka 19 tarik toh ka sngi wa waroh kiwa chimbynta haka lympung yalehke yong ka 6th Meghalaya Games 2025 u poi lut ki ha Jowai, West Jaiñtia Hills District neibhah wa nadooh mynstep ka 20 tarik kiwa boon ki jait yalehke u sdang noh ki, lait noh ka yalehbol kawa da sdang chwa ha kini ki sngi neidaw wym ye u pyndep smat kamwa man ya kiwi ki jait yalehke.
Waroh kiwa yalehke da em ki kamwa 3500 ngut, kamtæ neiliang ka West Jaiñtia Hills District da pdiang sñiawbha ko ya waroh kiwa yalehke na ki District waphær waphær ka jylla ha i thaw wa da pynkhreh ha Mukhla, hei emlang u MLA ka Jowai, u Wailadmiki Shylla, ki bor pait bor pynlai ka District, kiwa yahkhmat ka Meghalaya State Olympic Association, kiwa napoh ka chnat Sports & Youth Affairs ka sorkar jylla wa kiwi.
Ya waroh kiwa yalehke ha kani ka sngi da pdiang burom yaki deiwa pynkup ryndia tlem, kamjooh leh i e ki muna, ki ID wa kiwi najrong wa da pynkhreh leh ya ki ka cha wa i baam.
Kamtæ ha kani ka sngi da yohlaad leh u yaklam wa ki kattu katni ngut ki khynroo khyllood wa yalehke kamjooh kiwa yahkhmat yong ki heiyatoh wa i wan yong ki chapoh ka West Jaiñtia Hills District kamjooh cha Jowai yow chimbynta haka 6th Meghalaya Games heiwa da pynsñiaw ki yei kmen wei em leh wa man ka sien wa nyngkong wa poi ki cha Jowai.
Neitæ da yohlaad leh u yaklam wa u MLA ka Jowai uwa da yooluti wa kamwa da ya kreh chitom nadooh ki sngi wa dadep, ka yalehke u man hi ko kawa jop ha waroh ki liang.
Tæ kamwa da ya poi lut kiwa yalehke naki District waphær waphær kyntu haroh u ya ki paidbah ka West Jaiñtia Hills District khamtam ka chnong Jowai wow man kiwa yakrehlang ha kiwon kiwon ki bynta wei wow pdiang burom leh ya kiwa wan na baar la heiyatoh iwon iwon i emkaam yong ki neibhah boi boon kiwa poi Jowai dang haka sien wa nyngkong.
Discussion about this post