Ka lieñsuiñ chipai ka USA wa kit yow pynuiñ ya 119 ngut ki nong India kiwa psiah pyrchah ya ka aiñ cha America, da hiar ko Amritsar International Airport wa em ha Punjab chwa ka pyrdi synyaaw ynnin ka 15 tarik heipor 11:40 wei da man ka sien wa ar wa leh yeini hapoh 10 sngi nadooh wa chimkti u Donald Trump kam u President.
Kam wow pynkynmoo wa ha kawa nyngkong dooh ka lieñsuiñ kawa kit ya 104 ngut wa da hiar ko ha Amritsar ha ka 5 tarik wei sa kawi kawa kit sa 157 ngut da yooluti wa daw poi ko myntu ka sngi.
Na kini kiwa dang phah liwan da em 67 ngut na Punjab, 33 ngut na Haryana, 8 ngut na Gujarat, 3 ngut na Uttar Pradesh wa mar ar ngut na Goa, Maharashtra wa Rajasthan wa mar uwi na Himachal Pradesh wa Jammu & Kashmir wei ya kini da wan wow pdiang ya ki da kiwa ha-yung ha-sem ki.
Kiwa nyngkong dooh kiwa chah pynyuiñ toh na Haryana (33), Gujarat (33), Punjab (30), Maharashtra (3), Uttar Pradesh (3) wa na Chandigarh (2) wei kini toh kiwa da chah kit da kani hi ka lieñsuiñ chipai kawa da hær na San Antonio, Texas.
Kini kiwa wan nyngkong toh kiwa da chah kdoh i kti wei kjat ki wot hapoh ka lieñsuiñ wei da pynlait ki du hadien wa poi ki ha India iwa da pynchrai ya kiwa boon hadooh wa da yaklam yeini hapoh ka Parliament.
U External Affairs Minister ka ri, u S. Jaishankar da ong u wa da yaklam wa ka USA yow pyntikna wa kini kiwa chah pynliwan ym chah lehbeiñ ki wei da ong u leh wa ini i phah pynliwan ka US ya kiwa psiah pyrchah ya ka aiñ ymtoh iwa thymme.
U Prime Minister, u Narendra Modi uwa em ha US ha kani ka tayaaw wa dep da ong u wa ka India u pdiang ko ya ki bru kiwa em pyrchah ya ka aiñ ha US.
Kamwa man kattæ ki bru wym biang ki kot ki sla kiwa psiah cha USA, kiwa na India da man ki kiwa le wa boon dooh hadien ka Mexico wa El Salvador.
U Chief Minister ka Punjab, u Bhagwant Mann da lai u cha ka Amritsar Airport wei da ong u wa ka sorkar u pynbiang ko ya ki kari yow li booh ya kini kiwa chah pynuiñ cha ki chnong tre ki.
Discussion about this post