Ki paidbah nadooh dang step da yang chwa ki ha Guwahati Airport wa tymbud u sarok chwa u poi cha Shillong yow pdiang burom ya u Steve uwa jop ya ka India’s Best Dancer Season-4.
Ka Mawlai Social Service Organisation (MSSO) da pdiang burom ko ya u Steve Jyrwa ha lad Mawlai Bypass hajan ka ISBT kawa em ha Mawïong, hachwa wa u Steve u lai u cha madan Polo yow e khublei ya ki paidbah kiwa da kyrchaan ya oo hadooh wa yoh rah u yei naam jop.
U Steve daw poi u ha Polo yow e leh yei chaad sñiawbha neibynta ki paidbah hachwa u lai biang u cha Mumbai yow pyndep ya ki kaam yong oo.
Uni u khynroo uwa na ka chnong Nongmensong da yoh u ka laad wow wan e khublei ynne i janmiet ya ki paidbah ka jylla hadien wa da e ki yei kyrchaan borbah hadooh wow yoh u wow khur ya kani ka naam jop wa khroo bha hapoh ka ri.
Ya u Steve ha kani ka sngi da synraan lang da ka bei yong oo wa kiwa ha-yung deilang uwa sikai chaad ya oo ha kani ka rynsan yakob chaad, u Raktim najrong kiwi kiwi.
Mar ya mih na Guwahati Airport da pynriam pynbait ya u Steve da ka riam Khasi tynre wei ha luti da yoh leh wow e khublei ya kiwa boon ki paidbah wa kiwa chong chnong kiwa da yang chwa harood u sarokbah.
U Steve Jyrwa kattu daw hap u wow pynkhreh wow yakhun sa ha ka rynsan yakob chaad wa tip kam ka Super Dancer, wei daw ak u leh ha kawi ka phlim chaad wa daw pynmih da u Remo D’Souza.
Discussion about this post