Shillong: I pynkrehkaam ya ka rukom khrong dan kawa thymme namo wa tip kam ka Goods and Services Taxes (GST) ka sorkar pyrdi, da wanrah ko yei khrong dan wa rap bha ya ka jylla Meghalaya wei yeini da ong da u Joint Commissioner ka Taxes, u L Khongsit ynne ka sngi.
Ya ka GST da pynkrehkaam ha waroh kawi ka ri wa kynthup ha kani ka jylla Meghalaya kattu la chi snem, itæ nadooh u Naiynñiaw 2017.
I khrong dan toh na ki 20 hajar ngut tam kiwa su dan ha ka jylla kiwa da dep register du hadooh u Wisu 2018, da pyntip u Khongsit.
Da pyntip u leh wa ki bru wow register ha ka GST daw ku i ha ki sngi wow wan neibhah chwa wow pynkrehkaam ya ka GST, em hadooh 28 hajar ngut kiwa su dan ha ka jylla.
Katkam wa ong u Joint Commissioner, ka jylla da khrong dan ko kamwa T. 500 klur na ki jait mar waroh kiwa haap ha ka GST wa na ki mar kiwa lait na ka GST ka dan man ko T. 785 klur wa kynthup ya ka dan na i kiad, diesel wa petrol, itæ hapyrdi u Naiynñiaw 2017 hadooh u Wisu 2018.
“Hawa wyrchaw wa ki snem chwa wow wan ka GST, ka dan wa yoh ka tnat Taxation ka jylla da ku ko chiboon chah bar ya iwa nachwa,” da pyntip u.
Heijooh i por da ong u wa ini i yoh dan ympu man i iwa biang kamwa toh u yoh ka jylla wei dang em i duna wympu ye u chna ya ka MIS wa kiwi kiwi.
Ka GST Council da booh thong ko wa ka jylla toh u yoh dan ko kamwa T. 827 klur, deiwa pynchong yurim næ chim yukheiñ na u snem 2015-16 heiwa da khrong T. 738 klur iwa toh u kynjoh cha ka 14 percent katkam wa booh thong.
U Joint Commissioner da pyntip u wow pynbha yei rukom khrong dan na ka GST, ka tnat dadep pynman ko yei pynche paidbah ha kamwa 40 tylli ki thaw ka jylla.
“Hadooh u Wisu 2018, em 10920 ngut kiwa file return, 7000 ki wympu file return, 5177 ngut kiwa em ka yoh nong hapoh T. 20 lak, wei 4000 ngut kiwa em ka yoh nong palat ya ka T. 20 lak,” da pyntip u sahep ka Taxation, deiwa pynrap wa ki dan kynthup i ya ka SGST, CGST, Settlement wa ka Compensation Cess.
U Joint Commissioner da ong u leh wa i daiñ kuna ya kitu ki wym su dan man i T. 50 chi sngi ya kitu kiwa yoh nong T. 20 lak wei ya kitu won kiwa ym em yoh nong wym em iwon iwon i daiñ kuna.
“Hanlada i khrong dan ka jylla man i iwa khian hawa wyrchaw wa kiwi ki jylla ka ri, tangwa dang wan wa-ar ha ki jylla ka thaaiñ mihsngi lait noh ka Assam,” da ong u Khongsit.
Hawa pynsñiaw wa man ko ka dan kawa khian, u Khongsit da ong u wa du ka Mumbai Municipal Corporation ka dan na ka GST toh hadooh T. 40 hajar klur tam ha ka chi snem.
Discussion about this post