Ka yalang wa nyngkong yong ka Select Committee wa da chna neibynta wow pait wei wow bichaar bniah ya ki kyndon kiwa boon yong ka Khasi Hills Autonomous District (Khasi Inheritance of Property) Bill, 2021 næ ka Bill neibynta wow pynyoh lang kamjooh ya i hot i pot ki bri ki pa ya ki khon Khasi wa pura, daw chong yalang ko ha ka tayaw wow wan.
Ya ka yalang wa nyngkong yong ka Select Committee da booh wow pynman ha kani ka tayaw tangwa neidaw wym lait kiwa boon ki dkhot ka Committee, kamtæ da rai wow pynman noh ha ka tayaw wow wan.
U Chief Executive Member (CEM) ka Khasi Hills Autonomous District Council (KHADC) u Titosstarwell Chyne uwa man leh u Chairman yong ka Committee da ong u wa i wympu yoh wow chong yalang ka Committee ha kani ka tayaw toh neidaw wym em ki dkhot ka Committee kamtæ daw chong ya ka ha ka tayaw wow wan.
Kam wow pynkynmoo heini wa ka Liang Synchaar da wanrah ko ya kani ka Bill ha kani ka Dorbar Tlang wa dang dep tangwa tbian i por wei ka Liang Pyrchah da kyntu ko wa ya kani ka Bill toh u phah chwa cha ka Committee neibynta wow pait bniah heiwa da pynsñiaw wa daw man ka yañia hajrong kani ka Bill, neibhah wa ym em yoh por ki deiwa biang wow puræ bniah wei da chem wa em ki bynta wa hap pynbait kamtæ da rai wow phah chwa ya kani ka Bill cha ka Select Committee.
Ya ka Select Committee daw khlieh da u CEM ka KHADC katwa u Secretary ka Executive Committee u G. Syiemiong u man u kam u Member Secretary.
Kiwi won ki dkhot ka Committee kynthup ki ya uwa yahkhmat ka Liang Pyrchah u PN Syiem, u MDC na Mawhati u Charles Marngar, u MDC na Mawkyrwat u Carnes Sohtun kiwa man na ka Congress, u Paul Lyngdoh uwa man u EM ka KHADC wa u Lamphrang Blah, MDC ka NPP na Mawphlang.
