Jowai: Ka Society For Environment Protection and Sustainable Development (SEPSD) ka da chim ko ya ka rai wow pyrchah joor yei thmu wow booh ya ka karkhana Coke Plant kawa pynemkaam deiwa thang mooyong ha ka chnong Moolamylliang East Jaintia Hills District.
Ha i yachem kiwa yahkhmat ka SEPSD ynne ka sngi da ya rai wym chah wow seiñ ya ki karkhana hapoh chnong wa ha khap chnong kawa ktah ya i chait i khiah kiwa chong chnong.
U S. Dhar uwa man leh u Treasurer ka seiñ da ong u wa lada kani ka kharkhana yoh laad ko wow booh ha katai ka chnong daw man ko kawa sepai yei thrang kitai ki chnong wa em marjan wow kreh chitom ki u pynneh pynsah wow yada yaka rymaw, “Kamwa i da yoh i wow sakhi wa kini ki chnong kiwa marjan nadooh Moolamylliang, Lamyrsiang, Tluh wa Latyrke toh ki chnong kiwa tista bha haka kaam yada wow pynneh pynsah yaka rymaw wei da sakhi leh wa ka thaw kawa tip pyrtuid ka Bther ka em ko du 2 Kilometer naka chnong Moolamylliang wei ka em ko leh ya ka skur Syrpai English School wa ka yaw Umpleng kiwa jngai du kamwa 500 meter ha katai ka thaw nalor wa da em chwa ka Jaiñtia Cement.”
Ka SEPSD da yaroh ko leh yaka chnong Moolamylliang kawa ym pdiang ya katai ka karkhana wei u Dhar da ong u leh wa yeiñ ki hajrong ka yurim waka sur u paidbah wow pyrchah ya katai ka karkhana ha kiwon kiwon ki bynta wei daw e dorkhat leh cha u Director ka Industries, MSPCB, Forest and Environment, SEIAA wei leh cha u montri ka chait ka khiah wym toh u e laad ya kani ka karkhana wow wan ha katai ka chnong wei wow kyrriah cha ki thaw wa jngai na ki chnong ki thaw lane cha ki Industrial Estate næ Industrial Area.
Discussion about this post