Jowai: Ha ka Dorbar wa chisien chi snem yong ka Khasi Authors’ Society kawa pynman haka 19 tarik uni u bnai ha Shillong College, Shillong, u President ka seiñ, u Dr. D. R. L. Nonglait deilang wa u Vice President, u Dr. K. D. Ramsiej da pdiang sñiawbha ki ya u Rev. G. R. Sancley uwa da dap 90 snem ka rta uwa da psiah kam u dkhot ka KAS deilang wa 13 ngut ki dkhot wa thymme, kiwa kynthup ya u Rev. Dr. O. L. Snaitang, Prof. Antoinette Kharmalki, Dr. Rollingstone Wankhar, Dr. Barrylia Mesha Wolflang , Dr. Solony Bareh, Dr. Natalie Joanne Diengdoh, Dr. Joy Fully Sawkmie, ka Sweety Diengdoh, u John Robert Khongjee, u Wansalan E. Dhar, u Pynjopthiaw Nongrum, u Kolan Jones Diengdoh wa u Bikram L. Nonglait.
Ha i klam pdiang ya ki dkhot wa thymme, u Dr. D. R. L. Nonglait da ong u wa ha ki ar snem wa dadep, ka seiñ da dooh noh ko ya ki 6 ngut ki dkhot kiwa da heh yong ka seiñ tangwa i psiah thymme ki 14 ngut kiwi tawon ki dkhot daw yarap ko wow pyntyllung smat ya ki mat krehkaam ka seiñ.
Ki dkhot ka seiñ kiwa da khlaad ha kini ki ar snem toh Rev. Fr. Sylvanus Sngi Lyngdoh, Dr. Hamar B. Kharlukhi, u Kreishon Rapthap, u Hamarbabiang Mylliemngap, u L. H. Pde wa u Raijesh K. Lyngdoh. Kamtæ ha kani ka Dorbar, kam ka dak wow warom ya kini ki dkhot wa da khlaad noh da pynman ya ka suki kiaw wa 2 minit.
Ha kani ka dorbar, ka KAS da rai ko leh wow kreh chitom wow pynpsiah ya ka ktien Khasi ha ka Eight Schedule ka riti synchaar ka ri India. Hadien i yatai kawa slem hajrong kani ka phang kawa da chimbynta chongchit da ki dkhot, ka dorbar da rai ko wow pynman ya ki seminar wa ki pynche paidbah ha kylleiñ ki thaw hapoh ka bri u Ynñiaw Trep. Hadien kani daw pynman ya ka yalang pynche paidbah kawa heh ha Shillong.
Da rai leh wow ya krehlang wa ki seiñ kreh monsñiawbha kiwa hapoh ka jylla wa kiwa cha baar jylla kamjooh wei wow kyntu ya kiwa mihkhmat khamtam ya um montri rangbah wow chim noh ya ka rai wow dawa na ka Sorkar India wow pynpsiah noh ya ka ktien Khasi ha ka Eight Schedule.
Ka seiñ da khreh ko leh wow yachem ya ki montri ka sorkar pyrdi lada ka sorkar jylla phah ko ya kani ka kaam cha ka sorkar pyrdi.
Ha kani ka sngi da yoh leh wow pynthymme ya ki wa kitkam wa ki dkhot EC neibynta ka samoi krehkaam yong ki snem 2018 – 2020 wei man ki kamni ha wah:
President: Dr. D. R. L. Nonglait
Vice President: Dr. K. D. Ramsiej
General Secretary: Bah Ronald P. Kharshiing
Joint Secretary: Dr. Rollingstone Wankhar
Treasurer: Prof. Badaplin War
Editor : Dr. Barrylia M. Wolflang
Auditor: N. R. Gassah
Ki Dkhot Executive Committee: Prof. Streamlet Dkhar, Dr. Ester J. Shongwan, K. W. Nongrum, P. Kharshiing wa A. Sun
Ka seiñ da e khublei ko leh ya waroh kiwa da kyrchaan ya ka na ki por cha ki por ha ka yakhih yong ka.
Discussion about this post