Ka North Liberty Higher Secondary School, Jowai kawi na ki skur wa jooh rah naam rah burom ya ka Ri-loom Jaiñtia ha ka SSLC wa HSSLC Exam, ha uni u snem leh kani ka skur da rah naam biang ko ha ka thup Top 20 yong ka SSLC 2023 lyngba ki 3 ngut ki khynroo khyllood wa kynthup ya ka Reesa Ee Christine Suting kawa da yoh hei kyrdan wa 11, u Mendelson M. Langstang ha ka kyrdan wa 14 wa ka Rilanaika Sari ha ka kyrdan wa 20.
Ki ar ngut kiwa da yohlaad u yaklam ynne ka sngi da pynsñiaw ki i kmen wow yoh u khait ya u soh i kreh chitom wa da embyntalang nadooh kiwa sikai, ki bei ki pa yong ki, la hei i sneiñ i kroo næ i puræ puthi.
Hawa e mynsien ya kiwi won kiwa puræ, u Mendelson M. Langstang ong u wa emkaam u man kiwa kreh chitom hei puræ nadooh wa sdang snem khnang yow poi cha kawon kawon ka thong wa da mang.
“Kani man ko chibynta i yoh sñiawbha wa khroo tam hei im yong nga, wei ha nga hi samen sñiaw O i khreh kot nadooh wa sdang toh kawa emkaam dooh neibhah lada puræ syndon waroh ye u joor i ngiah hei bor i doh i pran, boi ye u yoh kjut leh,” ong ka Rilanaika Sari.
Chooh chooh da ban ko hajrong i emkaam u sumaar ya idæ nadooh wow biang leh ki Exercise, u biang i baam neibhah u khreh kot bait leh wym em u miat.
U Principal ka North Liberty Higher Secondary School Jowai, u Richard Uriah khana u wa kini ki 3 ngut wada rah naam ya ka skur toh kiwa puræ nadooh dang khian ha kani hi ka skur. Wei na ki 94 ngut wa yakhun ya ka SSLC, da lait 93 ngut, katwa ha ka HSSLC Arts won waroh 61 ngut kiwa yakhun da lait lut ki wei boon leh kiwa lehbha.
Heiyatoh wa ka Result HSSLC Science Stream wa da pynbna ini wa dep won khana u wa em arngut na kani ka skur kiwa da dooh u psiah haka thup Top 10 du da 2 wa 3 Marks donhi.
Ha kani ka sngi da yoh leh u yaklam wa ki bei ki pa yong kini ki khynnah kiwa da pynsñiaw i kmen wei sñiawngooh ya kiwa sikai kani ka skur, wei ong da ong leh wym toh iwa eh ya ki khynnah wa wan na kawon kawon ka yung u poi chakhmat la bien ki tang u kreh chitom.
Heijooh i por leh toh u man kiwa sñiawthooh yei yi wa leh næ puræ, neibhah wym myntoi u yoh ya kawon kawon ka kyrdan la duna won i sñiawthooh.
