Kamwa 90 ngut ki dkhot ka Congress da psiah ki cha ka BJP ynne ka sngi ha Khliehriat, East Jaiñtia Hills heiwa da pdiang burom ya ki da u State President, u Rikman G Momin kam chibynta leh wow wai yaka yung krehkaam ka Party wa em ha Khliehriat.
Ini da wan i hadien wa wan psiah u MLA warim ka Salmanpara u Winnerson D Sangma ynnin ka sngi chapoh ka BJP.
U Rikman da ong u wa da em i khih iwa napoh napoh iwa nang pynksan yei rukom krehkaam ka Party wei ym ye wow yaleh wa ka BJP kawa man ka seiñ saiñhima kawa heh dooh hapoh pyrthai. Wei hapoh i yahkhmat yong oo da ye wow pynyaar chooh chooh ya ki chnat krehkaam ha waroh Constituency.
Uwi na kiwa psiah cha ka BJP da ong u wa i daw wa pynman ya oo wow ieh ya ka Congress toh wa yoo u yei ye kiwa kitkaam ka Party wow pynsñiawthooh cha ki paidbah ya ki Scheme waphær waphær yong ka sorkar BJP wei ini da katik ko yei mynsien yong oo.
Kiwi won da ong ki wa ha ki jylla wa synchaar ka BJP i roi i paar nang ku i hawa nujor wa ka jylla yong i wei da toh i por ya ki paidbah ka jylla wow pdiang ya ka BJP kamwa pdiang ya kiwi ki National Party, neibhah ka BJP daw nang bichaar ko ha Delhi hapoh i yahkhmat u Modi kam u Prime Minister wei daw man ko i myntoi yaka jylla lada ya ksohkti waka Party.
U Rikman Momin da ong u wa ki paidbah hi toh kiwa rah khubor ya ki kaam bah wa ka BJP da leh ko hapoh i yahkhmat u Narendra Modi yow pynku yaka ri wei kawa sñiawthooh wow yaklam ya iyi iyi waroh wei kiwa yoh u khait ya u soh lyngba ki yarap wa boon wa da wan na ki Scheme u Modi tip ware ki yeini.
Discussion about this post