Shillong: Ka Bharatiya Janata Party (BJP) ynne ka sngi da pdiang ko ya ki soo ngut ki MDC ka Jaiñtia Hills Autonomous District Council (JHADC) wow man kam kiwa mihkhmat yong ka BJP wei kini ki soo ngut ki toh kiwa jop na ka UDP ha ka Election MDC uni u snem, wei kyntyhup ki ya u Lakhon Biam, Krison Langstang, Treilang Suchiang wa u Dawan Lyngdoh.
Ya kini ki soo ngut da pdiang sñiawbha ya ki da u heh ka Party ha Meghalaya, u Nalin Kohli hei emlang ki heh ka BJP Meghalaya Pradesh, wa kynthup ya u AL Hek, u Sanbor Shullai kiwa man ki MLA ka Party, u Shibun Lyngdoh wa ki heh ka party na Jaiñtia Hills kamjooh kiwa kyrchan wa kiwa hayung kini ki MDC.
Ha ka yalang wa tbian, u Kohli da pynsñiaw u yei sñiaw sarong wa ka party da yoh ko ya ki MDC ha JHADC, neibhah i wan psiah kini ki MDC daw pynkhlan ko ya ka party neibhah wa man ki kiwa mihkhmat paidbah wei rap tip ki yei emkaam wa i eh i khoo ki paidbah.
Da ong u wa ha ka Election MLA ha u snem wa dadep ka Party da ku i yoh vote ko hanla da jop ko du ar ngut leh tangwa da rem salit ko ha kiwa boon ki Constituency.
U Kohli da ong u leh wa ka BJP toh ka seiñ kawa heh dooh ha pyrthai kawa em palat 11 klur ki dkhot dei booh thong wow kynjoh 17 klur ngut.
Discussion about this post