Kiwa kyrchaan bah yong u HM Shangpliang, MLA ka Mawsynram da kam ki wa ha Mawsynram Constituency hi, ki paidbah dang lah ki chiboon ya ka BJP bar ya ka Trinamool Congress, ka Party kawa u MLA yong ki da emlang u katni deilang wa ki 11 ngut ki MLA ka Congress.
Ya ini da pynsñiaw da kiwa yahkhmat yong ka TMC Mawsynram hawa klam wa ki laad pathai khubor hadien wa dep ki u psiah cha ka BJP ha ka yalang kawa da pynman ha yung krehkaam yong ka BJP kawa da pynman ha Shillong.
“Kam kiwa yahkhmat yong ka TMC ha Mawsynram wei kam u Vice President hawa nga pait won yei long i man ha ka ri lane wot ha ka Constituency yong i leh, katai ka Party dang chem chitom ko wow sooh thied. Kawi leh wa ya ki kaam yong u Modi kam u Montri Rangbahdooh ka ri, ki paidbah yong i da yoo ki tangwa ya ka TMC won ym pu yoo ki,” da ong u Rudy Shangpliang hawa klam wa ki laad pathai khubor hadien wa da dep wow psiah cha ka BJP.
Ha iwi won i liang, da kyntait u wa ini i psiah BJP yong ki toh iwa da phah da u MLA, u HM Shangpliang. “I ym tip i yei yaklam hapyrdi kiwa yahkhmat ka Party wa u MLA. Tangwa ini i wan yong ki da man bait wow pynkhlan ya ka BJP neibynta ka Election wow wan yow pynjop ya u kyrtong yong ka,” da bynrap u.
Ya kitai kiwa yahkhmat ka TMC na Mawsynram da pdiang burom da u National Executive Member ka BJP uwa man leh u MLA ka Pynthorumkhrah, u AL Hek deilang wa u State Vice President ka Party, u Dipayan Chakraborty wa kiwi kiwi.
U AL Hek hawa klam ha katai ka yalang da ong u wa toh i krehkaam wa khooid wei wa che yong ka BJP iwa pynman ya kiwi ki MLA wow psiah cha ka Party.
Da kob u leh wa dang boon kiwi won ki MLA kiwa daw wan psiah wa kynthup ki MLA warim wa kiwi kiwi kiwa yahkhmat.
