Ka All Jaiñtia Cricket Association (AJCA) da psiah Final ko ha ka Zone 1 ka Inter District U-19 Boys Cricket Tournament deiwa jop ya ka East Jaintia Hills da 9 Wicket ynne ha Wahiajer kawa da pynman da ka Meghalaya Cricket Association deilang waka AJCA.
Ka AJCA kattu da em ko 8 Point na ki ar tylli ki yalehke ha ka Group B kawa em le tylli ki dhab. Wei ya ka Final daw pynman ha kani ka 30 tarik waka liang wa jop hapoh ka Group A kawa dang yang u pyndep.
Ynne ka EJH da jop ko ya ka kylla khlem wei da jied ko wow Bat nyngkong tangwa da lehbha kiwa kwang bol ka AJCA heiwa u Saibormiki Passah 3/17, u Puraki Shadap Passah 3/24 wa u Chwamiki Ryngkhlem 2/7 toh kiwa pynhaap Wicket heiwa ka EJH da haap lut ki Wicket ko deiwa kamai 84 na ki 22.2 Over wei da kamai boon dooh da u Nishikania Sinha uwa da yoh 34 Run (5×4, 1×6) na ki 44 bol.
Ka AJCA ye em chem chitom ko wow kdong ya ka thong deiwa dooh du chi Wicket wa pynhaap u Rohit Sharma (1/19). U Jeremaia Mukhim (44) wa u Chwamiki Ryngkhlem (20) da neh ki khlem haap yow pynjop. Yei lehbha u Chwamiki daka Bat waka bol, da yoh u leh yei naam Man-of-the-match.
Mynstep ha ka Group A ka Zone 1, ka Shillong CA (A) daw yachem ko waka Shillong CA (B) heiwa ka SCA (B) toh kawa da em hei nyngkong deiwa yoh 8 Point katwa ka SCA (A) 4 Point.
Ha ka Zone 2, ka Tura District CA daw yachem ko waka East Garo Hills ha Tura.
