Ka Ehrngiew FC da yoh ko wow psiah Final ha ka 6th Invitation Wahiajer Football Tournament 2022 wa pynman da ka Wahiajer Sports Club ha Wahiajer deiwa pynrem ko yaka Lamare SC deiwa yachut Ti-Breaker 6-5 ynne ka sngi.
Ka yaleh hadooh wa kut i por da neh ko da mar chi kool heiwa da thap nyngkong da ka Ehrngiew ha ka minit wa 58 lyngba u Reson Malngiang katwa ka Lamare SC da su kylliang ko ha ka minit wa 82 lyngba u Nelson Rymbai, kamtæ da rah ya ka yalehke cha ka Extra Time wei heini ym em wa yoh u pyntam.
Kamtæ u Referee da pynman u daka yachut Tie-Breaker heiwa ka Ehrngiew da yoh ko u thap 6 sien katwa ka Lamare SC da yoh ko u thap 5 sien.
Da ini i jop ka ka Ehrngiew FC da yoh ko u psiah Final heiwa yei naam Man of the Match da yoh rah da u Goalkeeper ka Ehrngiew u Eric Nongkhlaw heiwa ya ka khusnaam da saam da u Eveningstar Tron uwa man u MDC ka Nongjngi uwa man leh u EM In-charge Market ka JHADC.
Ka yakhun Semifinal wa ar u man ko haka 02-04-2022 heipor 2:00 waje i sngi hapyrdi ka Azariah FC waka YBSC Shella.
