Jowai: Ka yalehke Super Division 2019 kawa tip leh kam ka “Kyrmen Shylla Contribution Trophy” kawa pynlai da ka East Jaiñtia Hills District Football Association da jan poi ko cha wa kut.
Haka yalehke Qualifier-1, ka yalehke da pynman hapyrdi ka Khliehriat West FC pyrchah yaka Sutnga SSCC, kiwa man ki ar tylli ki Team kiwa em hakhlieh dooh hei boon Point.
Ka yalehke hapyrdi kini ki ar team haka Playoff man ko kawa yathain bha. Wot hapyrdi u slap, ka Sutnga SSCC ym e laad ko ya kiwa yalehke yah khmat ka Khliehriat West FC wow pynkhih yaka jaar yong ki. Kamjooh i khlan kiwa yang dien ka Sutnga SSCC, ka yalehke da kut ko khlem em wa yoh u thap kool.
Ini da man i i jooh haka Extra Time kamtæ da pynman da ka yahcut Tie-breaker heiwa ka Khliehriat West FC da jop ko da 3-1 yaka Sutnga SCCC.
Yaka Khliehriat West FC da yahkhmat da u Laskyboy Swer kam u Coach, uwa da jooh man leh uwa yalehke wa mihkhmat yaka jylla haka Santosh Trophy wa ha kiwi ki yalehke.
Kamtæ da ini i jop, ka Khliehriat West FC da booh ko ya i thaw haka Final yong ka Super League 2019 ka EJHDFA. Ka yalehke Elimination Round u pynman hapyrdi ka Rymbai Wahshnong SC pyrchah yaka Thangskai Tiger FC.
Ka Sutnga u yoh laad ko sa chisien heiwa daw hap ko u yachem pyrshah ya kiwa jop ka Elimination Round haka Qualifier-2.
Kam wow pynkynmoo wa ka Champion ka Super League daw yoh ki wow mihkhmat yaka EJHDFA haka Meghalaya State League.
Ini toh katkam ka khubor wa e da u General Secretary u Coming TM Tlang.
Discussion about this post