Ka Rising Star da jop ko yaka Semi Final wa ar yong ka lympung yalehke Open to All T20 Cricket Tournament 2021 wa pynman daka All Jaintia Cricket Association ha madan Jrisaleiñ, Jowai ynne ka sngi.
Ha kani ka yakhun Semi Final da pynman hapyrdi ka Rising Star wa ka Khliehtyrshi Sports Club heiwa ka Rising Star da jop ko da 6 Wicket.
Ya ka kylla-khlem da jop da Khliehtyrshi Sports Club wei da jied ko wow kamai nyngkong heiwa da yoh ko 93/5 na ki 20 Over. U Tummi Ryngkhlem da kamai u 17 Run (3×4) katwa u D. Bang won da yoh u 15 Run (2×6). U Sanki Pakyntein yong ka Rising Star da yoh u wow pynhaap 3 Wicket na ki 4 Over.
Ka Rising Star hawa beh yei thong da ye ko u kamai 94 Run na ki 9.2 Over deiwa dooh 4 Wicket. U Yutang Kma da kamai u 25 Run (3×4 wa 2×6), u Dawanroy Nongpluh won da kamai u 21 Run (2×4 wa 2×6). U Conard R Sana yong ka Khliehtyrshi Sports Club da yoh u pynhaap 2 Wicket na ka 1 Over.
Da ini i jop, ka Rising Star da yoh ko u psiah cha ka Final wei u yachem ko wa ka Umchangiar ha ka Final ka wow man ha ka 10-04-2021 heipor 11:15 i step.
