Jowai: Ynne ka 8 tarik, ka seiñ Jaintia Student’ Movement (JSM) da pynman ko yaka yalang ha Community Hall ka chnong Khliehmyntriang, East Jaintia Hills District neibynta wow pdiang sñiawbha ya u Pilarstone Phawa wa jooh ksoh kam u General Secretary ka seiñ All Jaiñtia Students Union (AJSU) Central Body heiwa da em lang kiwa yahkhmat ki Circle wa ki Unit waphær waphær wa kynthup nadooh ka Shangpung Unit, Nartiang Circle, Jowai Circle, Mudop Unit, kiwa man ki chnat ka AJSU waroh chi kattu, kamtæ ynne ka sngi da pynyabi wei da kylla pyrtuid ki cha ka Jaintia Students’ Movement, kamjooh ha kani ka sngi da yoh leh wow pynkha ya ki Unit wa thymme ka seiñ JSM wa kynthup yaka Nongdhar Unit, Lapangap Unit ( Adhoc) waka War Jaiñtia Circle ( Adhoc).
Yaka yalang da pynlai da u Publicity Secretary u Skhembhalang Dkhar, wei da pynbaam smai ya kiwa yahkhmat wa thymme kini ki Unit da u President rangbah ka seiñ u Leningstar Rymbai.
U Rymbai hawa e yei klam ha kani ka sngi, da yaroh u ya u Pilarstone Phawa wa kiwa yahkhmat kitai ki Unit waphær waphær. Chooh chooh da e u yei snieñ wa kam kiwa yahkhmat ki seiñbhalang wa ym toh u man ki du ha i pyrtuid donhi, toh u em ki ka mynsien chynrang wow mylliñ yei emkaam yong samen, ka pyrkhat ka pyrdaiñ kawa khooid, i kitkhlieh hajrong kiyi kiyi waroh khamtam yaka jaitbru.
U Pilarstone Phawa hawa e yei klam yong oo da ong u i wan pynyabi yong oo cha ka seiñ JSM toh hajrong ka yurim wa kwah u wow wanrah yaka yatylli kam ki khon khynroo wa em ka mynsien maya ri. Da ong u leh wa kamwa man katni wa hapoh ka ri-loom Jaiñtia em chiboon ki seiñbhalang kiwa ym ye de wow ñiaw hadooh katwon tylli em ki, tangwa ka jaitbru won dang chah ksih ko wot i chaniah na kiwa boon wa lang ya ki seiñbhalang da jan dooh ko khamtam manda pait yei roi ki kaam wa sih wa boonjait, i dooh kaam dooh jaam khamtam yaka jaitbru yong i wa khian paaid.
Kamtæ da ong u wa hajrong kani ka yurim da pynman ko ya oo wow pynyabi noh cha ka Jaintia Students’ Movement neidaw wa hei yoo yong oo wa kani ka seiñ em kyrmen ko neibynta ka mynried ka mankawi ka jaitbru.
Da pynkut u deiwa ong wa ym phær lada ksoh u ya kawon kawon ka kyrdan hapoh ka seiñ neibhah kwah u du wow chakri yaka jaitbru.
Ha kani ka sngi da yoh leh yei klam na u General Secretary u Edie Lamare, u Ardipaul Rymbai Chairman ka JSM Social Cell , u Shnalad Rymbai President JSM Eastern Region wa kiwi kiwi.
Discussion about this post