Ka St. Mary Mazzarello Girls Hr. Secondary School, Jowai kam chibynta wow e laad ya ki khynnah u embynta ki ha ka Bharat Scouts-Guides Movement, ynne ka sngi hei pait i pynlai ki ar ngut ki Guide Captain wa kynthup ya ka Modistalin Marbaniang waka Caredalin Kharbhih da pynman ki ya ka Investiture Ceremony namo i pynpsiah dkhot ya ki khynnah skur.
Ya kani ka yalang da sakhilang da u Adiam U Bthuh, District Secretary MBS&G, West Jaiñtia Hills kam u kongsan hei emlang ka Principal ka skur, ka Sr. Teresa Phawa kam ka symbood kongsan, ka Chwadaka Laloo, Guide Captain wa kiwa sikai.
Ha ka yalang wa pynlai da ka Caredalin Kharbhih, da yoh i klam pdiang burom da kawi na ki khynnah Guides yong ka St. Mary Mazzarello Girls Hr. Secondary School, Jowai katwa ka Chwadaka Laloo, hei klam da e mynsien ko ya ki khynnah da ki kyntien sneiñ kyntien kroo kiwa yatoh wa ka yurim krehkaam ka Scouts-Guides Movement.
U Adiam U Bthuh hawa klam kam u kongsan da ong u kam ki khynnah Guides kiwa dachim ya ka kular ynne ka sngi wow leh yeiwa bha tam neibynta wow chakri yow bru yow Blai, toh u man leh ki khynnah wa em ka thong wow pyndep ya ki kyrdan waphær yong ka Scouts-Guides Movement kat hadooh wow yoh ya ka President Award.
Chooh chooh da yoh leh ki kyntien e mynsien ya ki khynnah na ka Principal heiwa da ong ko ka Scouts-Guides Movement toh ka seiñ wa em ha chityllup pyrthai kawa yieñ wow kreh yei miat i bha yong ki khynnah kamjooh yong ka imlang sahlang ka chnong ka thaw, kamtæ kyrsu kyntu ko ya ki khynnah Guides ka St. Mary Mazzarello Girls Hr. Secondary School wow man ki ka nongmuna wa bha ya kiwi ki khynnah hapoh ki soo kynroh ka skur kamjooh leh cha baar yong ka skur khnang wa ka pyrthai u yoh ko u yoo u sakhi ya ki kaam wamiat wa bha yong phi.
