Ka National People’s Party (NPP) West Jaiñtia Hills ynne ka sngi da pynman ko yaka yalap Election MP ha Ladthadlaboh Indoor Stadium, Jowai heiwa ya ka yalang da pynlai da u MLA ka Jowai, u Wailadmiki Shylla.
Ha kani ka yalang da pdiang sñiawbha ya u Krison Langstang uwa man u MDC ka BJP na Sumer, u Daniel Dann u kyrtong MLA ka Congress na Jowai, u Nehemayah Tyngkan, kyrtong MLA ka Congress na Mowkaiaw, u Lasting Suchiang u kyrtong MLA ka TMC na Mowkaiaw wa kiwi chapoh ka Party NPP.
U National Secretary ka NPP, u Sniawbhalang Dhar hawa e i klam ha kani ka sngi da e khublei u ya ki soo ngut kiwa da psiah cha ka Party deiwa ong wa i psiah kini ki soo ngut daw pynkhlan i yaka NPP khamtam chwa ka Election MP.
Chooh chooh da ong u leh wa u President ka VPP, u Ardent Basaiawmoit kwah u wow pyndoohjait ya ki kynthai deiwa e jait ya ki khon cha ki chynrang.
Heijooh i por da ong u wa da chah pynbaad ki wa baam-tooh ki yaka poisa, hawa kamtæ kammon u jied ki paidbah ya ki hadooh soo sien lynter.
U Sniawbhalang da ong u leh wa wot hajrong i chah beiñ chah pynbaad ka NPP, tangwa lada toh iwa sakhiat ym em ki MLA wa MDC warim ki wow psiah cha ka NPP man-ka-sngi.
Neiliang won u Prestone Tynsong kam u State President ka NPP, da ong u wa heiyatoh wa i chah pynbaad wan i chisien san snem wei hapoh i yahkhmat ka NPP, ka sorkar MDA-1 wa i pteiñ ka MDA-2 da sakhi wa dang khlan ka Party wei da ngait skem u wa ha ka Election MLA wow wan wa daw ye ka NPP u synchaar samen.
Da ong u wa katkam wa man katni da chongchit ka la’ær u Prah ha Jowai tangwa emkaam u chongchit hajrong ka yurim wa skem wei ymtoh u chah yah bakla donhi ha ki kattu katni ngut.
Chooh chooh da ong u wa heiyatoh wa u pood ka jylla ym em wa nood u yaklam pynbait ya oo tangwa ka sorkar NPP da tia ko chaphrang wow leh yeiwa emkaam.
U National President ka NPP, u Conrad Sangma hawa e i klam ha kani ka sngi da ong u wa heipor wa sdang ya ka Party hapyrdi u Sniawbhalang Dhar, u Prestone Tynsong wa u Comingone Ymbon da tieñ bha ki tangwa ynne da kmen u wow yoo wa da khlan bha ka Party wa da psiah dkhot kini ki bru.
Da ong u wa em i daw wa ka sorkar MDA-1 pyndep ko ya ka samoi yong ka wei ileh chaniah ki paidbah yaka MDA-2 wei ini man iwa yaar bha wow jied ki paidbah ar sien yaka sorkar.
U Conrad da ong u wa em bait i duna heini heitai tangwa i daw wa jop toh wa ap, sñiaw wei kreh neibynta ki paidbah yeiwa sñiawkhia ki wei iyi emkaam ki wei ini toh nei kreh chirup wei iwa yatylli wei ap ki iwi ya iwi.
Chooh chooh da ong u wa kam ka sorkar chlur ko wow chimkti ya ki kaam wa kiwi ki sorkar warim ym nood ki wow tba lada ka Them Metor, u mooyong, i chna yung dorbar chna aiñ wa kiwi kiwi.
Heiyatoh wa i pyrchah ya i ktien Hindi da ong u wa manda poi palat Khanapara da hap klam dei Hindi, ha Parliament emkaam u tip u klam Hindi, manda pynbait ya u pood emkaam u klam u sñiawthooh ya i Hindi wei em ki seiñ kiwa pynbiej paidbah heiwa manda kylli na ki yei pyrtuid ki chnong wa kajia pood ymtip ki. Da pynrap u deiwa ong wa ya u pood da sdang kani ka sorkar wow pynbait wei u pyndep ko leh hawa kut ya ini i kaam.
Da ong u wa ha ka sien wa nyngkong yong ka jylla da em ka sorkar kawa em ka thong wow kreh neibynta ki paidbah ka jylla.
U Conrad da ong u leh wa manda jop ka Dr. Ampareen Lyngdoh daw ye ko u kreh chirup ka sorkar pyrdi waka sorkar jylla ha kiwa boon ki bynta nadooh ka Eight Schedule, i pynbait pood wa kiwi kiwi.
Heiyatoh wa i thap Vote cha ka Election MP ka wow man ha ka 19 tarik uni u bnai da kyntu u ya waroh ki dkhot ka Party wow kreh chitom ha kini ki 15 sngi wow wan.
Kiwa psiah cha ka Party da khana ki ya ki daw wa psiah ki cha ka NPP heiwa da ong ki wa kani ka Party toh kawa da tipmit ha waroh kawi ka ri India heiwa da sdang ya ka napoh jylla.
Da ong ki leh wa emkaam bha wow pynkhlan ya ka Party hapoh jylla kamjooh ha kiwi ki jylla deiwa ong wa ka NPP ymtoh ka seiñ wow thooh ya i eh i khor tangwa ka wow thooh ya ki laad ki luti.
Discussion about this post