Ka sngi wow sah kynmoo ya ki khynnah skur kamjooh ya ki bor pait bor pynlai ka Little Angels Secondary School, Jowai wa ha ka 9 tarik uni u bnai hei pait i pynlai ka Doly Lamare, Guide Captain da pynman ya ka Enrolment & Investiture Ceremony neibynta ki khynnah skur wa kwah u man kam ki Scouts wa ki Guides.
Ya kani ka yalang da wan sakhilang da u Ohiwot Laloo, District Commissioner Scouts, West Jaiñtia Hills kam u kongsan, ka Chwadaka Laloo, District Commissioner Guides kam ka symbood kongsan hei emlang leh ka Principal ka skur, ka E.E. Laloo, u Chairman School Managing Committee, u Dr. Khonglah, kiwa sikai wa ki khynnah skur.
Ha ka yalang wa pynlai da ka Doly Lamare, Guide Captain da yoh i klam pdiang burom na u Dr. Khonglah, Chairman SMC neitæ da yoh leh ki kyntien sneiñ kyntien kroo wei e mynsien ya ki khynnah na ka Chwadaka Laloo kam ka symbood kongsan wa na ka E.E.Laloo, Principal Little Angels School.
U Ohiwot Laloo hawa klam kam u kongsan da pynkynmoo u ya kawi na ki kaamram wa hakhmat yong ki khynnah Scouts-Guides toh wow yada ya ka bei rym-aw wa ki soodong sookun yong ka wei da kyrsu kyntu u leh ya ki khynnah skur ka Little Angels wow man kiwa tip u yada, u maya ya ka bei rym-aw wei u kheiñkor kheiñ kyntang yei man yong ka hei im wa man-ka-sngi ym du kat ha ki rong chi sngi næ World Environment Day.
Ya ka bynta wa khroo wa kyrpang katkam ka rukom dustur yong ka Bharat Scouts & Guides neibynta ki khynnah Scouts da pyndep da u Adiam U Bthuh, District Secretary MBS&G West Jaiñtia Hills katwa ya ki khynnah Guides won da pyndep da ka Doly Lamare, Guide Captain Little Angel School, Jowai.
