Ka National People’s Party (NPP), East Jaiñtia Hills District Unit da pdiang sñiawbha ko ya u Lalwilliama Thaite, MDC ka Saipung–Nongkhlieh Constituency uwa da jop na ka Congress ha uni u snem deilang wa u Philip Tangliang, MDC warim ka Sumer kiwa da psiah noh chapoh ka Party ha ka yalang wa da pynman ha Khliehriat West Community Hall.
Ha kani ka yalang da emlang leh u Wailadmiki Shylla, MLA ka Jowai, ka Santa Mary Shylla, MLA ka Sutnga–Saipung deilang wa ki MDC wa boon wa kynthup ya u Seiborlang Shadap, MDC (Sutnga–Narwan), u Hambertus Nongtdu, MDC (Sutnga–Nongkhlieh), u Dr. Sankey Shangpung, MDC (Bataw–Lakadong), ka Violet Lyngdoh, MDC (Khliehriat–Rymbai), u Krison Langstang, MDC (Sumer); u Thomas Nongtdu, Ex-MDC JHADC; u Octomewot Lamin, Ex-MDC JHADC wa u Emlangky Lamare, Ex-MDC Narpuh.
Da emlang leh kiwa kreh ka Party, ki heh chnong, kiwa kyrchaan ka NPP wa kiwi de kam ka dak wow pynyoo yei khlan wei yatylli ka Party ha kani ka thaaiñ.
U Wailadmiki Shylla hawa e yei klam da ong u wa i psiah u Lalwilliama Thaite wa u Philip Tangliang cha ka NPP pynyoo ko yei chaniah wei man skem kiwa yahkhmat ka Party wei kamjooh yow ya krehlang neibynta ka roi ka paar ka thaaiñ.
Neiliang ka Santa Mary Shylla hawa e yei klam da ong ko wa kani ka sngi pynyoo ko yei yatylli wei deiwa yoh yei kyrchaan u Lalwilliama Thaite wa Philip Tangliang daw pynkupbor chooh chooh ko ya ka NPP wei wow ya krehlang chirup wa ki paidbah deiwa booh yei chakri hakhmat, i kreh salonsar deiwa kduplang ya waroh.
Ya ka yalang da pynlai da u Daiapherbha Lamare , Secretary National People’s Youth Front (NPYF) East Jaiñtia Hills District Unit.
Discussion about this post