Ka lympung yalehbol ka Elaka Narpuh Sports Association (ENSA) kawa tip kam ka ‘Elaka Narpuh Football Tournament Champions 2021′ da pteiñ biang ya ka ynne ka 17 tarik da le tylli ki yalehke Pre-Quarter Final ha madan bol ka Umkiang.
Ha ka yalehke wa nyngkong da pynman hapyrdi ka Brichyrnot A waka Ratacherra Lumtrom, da rai ya kiwa jop da ka yachut Tie-Breaker heiwa ka Ratacherra da jop ko da 3-2. Hachwa ini, ka yalehke da kut ko da 1-1 da ki kool wa thap u Boby Nongtdu ha ka minit wa 20 ya ka Brichyrnot katwa ya ka Lumtrom da thap da u Khlainbor Nyalang ha ka minit wa 51.
Ha ka yalehke wa ar kawa hapyrdi ka Lumshnong YWSC A waka Tongseng Narpuh A, ka Lumshnong da jop ko da 1-0 da ka kool wa thap da u Skhemborlang Rupai ha ka minit wa 28.
Ha ka yalehke wa le, ka Shymplong FC da jop ko yaka Lejri FC da 3-1.
Ya ka Shymplong da thap kool da u Raplang Syih ha ka minit wa 4, u Fedrick Suchen ha ka minit wa 28 wa 34 katwa ya ka Lejri da thap da u Effor Dhar ha ka minit wa 19.
Kini kiwa jop da yoh ki wow psiah Quarter Final.
