Ha ki yalehke Quarter Final ka 2nd Shkenpyrsit Secondary School X RMSA Invitation Football Tournament 2021-2022 kiwa da pyndep ynnin ka sngi, ka Syndai Kmai Chnong FC waka KSU Mupyut Unit da yoh ki wow psiah Semi-Final.
Ka Syndai Kmai Chnong da yachem ko waka Shkentalang FC heiwa ka Syndai da jop ko da 1-0 lyngba ka kool wa thap u Batiphar Swer.
Ha ka yalehke wa ar won, ka KSU Mupyut Unit da yachem ko waka Syiem FC heiwa ka KSU da jop ko da 2-1. Ya ki kool ka KSU da thap da u Ronal wa u Dame katwa ka chi kool ka Syiem da thap da u Lastborn Suting.
Ka Semi Final wa nyngkong u pyman ha ka 25 tarik uni u bnai heipor 2:30 i sngi hapyrdi ka Nonglamin FC pyrchah ya ka Tur-Iap FC. Kamtæ da khut da wer ya ki paidbah wa maya bol ka thaaiñ wow wan pynchongchit ya ka yalehke.
