Ha ka yakhun yalehke Quarter Final wa le yong ka 1st War Jaiñtia Invitation Football Tournament 2025 wa pynman ha ka 25 tarik uni u bnai ha madan Amshipai, Amlarem, ka Padu United Sports Club kawa man ka Champion ha ka 2nd Division ka Amlarem Sub-Division Sports Association, da yoh ko wow psiah Semi Final hadien wa pynrem ko ya ka Nongkhrohrim Sports Club kawa man ka Champion ha ka Super Division, Thadlaskein Sports Association.
I yoh rah naam jop ka Padu United Sports Club toh hadien wa da yoh thap ko 3 kool katwa ka Nongkhrohrim Sports Club won yoh thap ko du chi kool.
Ya ki 3 tylli ki kool ka Padu United Sports Club da thap da u June Buam ha ka minit wa 8 wa 72 katwa u Jeft Pakyntein won ha ka minit wa 19.
Ya ka chi kool ka Nongkhrohrim Sports Club da thap da u Helmi Mukhim.
Ha ka yakhun yong ka kylla miet neiliang ka Nongkhrohrim katwa ye wa lah da dohyap ko wow yoh u su biang ya ki kool ka Padu United tangwa ym em ye wei yoh laad de ko hadooh wa kut i por.
Neiliang ka Football Committee yong ka Sports and Youth Sub Committee ka seiñ, da pyntip haroh ko wa ka yakhun wa bood ha ka tayaaw wow wan u man ko hapyrdi ka Syndai Pyllun SC, Syndai (Selected Team) pyrchah ya ka Nongmadan Sports Club, Nongmadan kawa na thaaiñ Pynursla.
Ka yalehke u pynman ha ka 03-05-25 heipor 2:00 waje i sngi ha ka jooh hi ka madan ha Amshipai.
Discussion about this post