Shillong: Ka Lawmali da man ko kawa nyngkong wow psiah cha ka Semifinal ka 4th Assam Rifles Invitation Football Tournament hadien wa pynrem ko yaka Lawsohtun da 6-1 haka yakhun Quarterfinal wa pynman haka madan ka Assam Rifle ha Laitkor ynne ka sngi.
Haka yalehke chwa kani ka Mawpat da pynrem ko yaka Mawkhar da 4-3 lyngba ka Tie-breaker hadien ka yalehke da kut ko mar chi kool.
Haka yalehke Quarterfinal ka Lawmali da lai ko cha khmat da ki ar tylli ki kool na u Will Marbaniang uwa thap kool haka minit wa 3 wa 6.
Ka Lawsohtun da ye ko wow su kylliang chi kool haka minit wa 50 lyngba ka Free-kick u Ksan Khongmalai kawa uwa yang kool ka Lawmali u Eric Nongkhlaw ym ye de u wow khang laad.
Ha ki 40 minit wa bood ka Lawmali da thap ko sa 4 tylli ki kool wa kynthup ya ka kool haka 63 minit na u Damehun Syih uwa da pynchaad ya uwa yang kool ka Lawsohtun u Aebor Nongtdu.
Hadien 4 minit u Syih da yarap u wow thap biang sa chi kool deiwa e ya ka bol cha u Marbaniang uwa da e won cha u cha u Shanbor Jyrwa uwa thap ya ka kool.
Haka minit wa 79 u Jyrwa da thap u da ka Penalty wei da pyntikna yei jop sa kool wa thap haka minit wa 82.
Ya ki Quarterfinal wa ar tylli daw pynman mynstep hapyrdi ka Seven Brothers waka Smit heipor 10:30 i step, pynbood saka Assam Rifles pyrchah yaka Mawpdang heipor 1:30 i sngi.
Discussion about this post