Ki ar ngut ki MLA kiwa da jop na ka Congress ha u snem 2018 wei kiwa da hiar chuki noh ynne ka sngi kiwa kynthup ya ka Dr. M. Ampareen Lyngdoh wa u Mohendro Rapsang da psiah noh ki pyn ynne hi ka sngi cha ka National People’s Party (NPP) ha ka yalang kawa da pynman ha Madan Ïewrynghep, Laitumkhrah.
Ya kini ki MLA da pdiang sñiawbha da u National President ka NPP uwa man leh u Montri Rangbah ka jylla, u Conrad K Sangma, u Prestone Tynsong uwa man u National Vice President wa kiwi ki heh ka Party deilang wa kiwa kyrchaan.
Ha kani ka sngi neiliang ka NPP da pynbna paidbah ko ya ki 6 ngut ki kyrtong ha Shillong City, heiwa ka Dr. Ampareen u man ko kawa e ktien ya ka Party ha ka jylla.
Hawa klam cha kiwa thoh khubor hadien wa da kut ka yalang, ka Dr. Ampareen da ong ko wa na Shillong ki kyrtong daw pynkhihwin ki neibynta ka Party wow kreh yei bha ka ri wa ka jaitbru. Da ong ko leh wa ym myntoi wow maya ri maya jaitbru lada chong samen, wei da khut ko yow em i yatylli lang wow poi cha ka thong.
Da ong ko wa ka NPP ymtoh ka Party kiwa nawi wei lada dang piah ka jaitbru najrong ini ym poi de cheiwon cheiwon deiwa pynrap wa hap wow mylliñ noh yei bakla wei i kwah yong samen.
Hawa kylli da ong ko wa i daw wa pynman ya ka wow psiah cha ka NPP toh wa ha ka NPP ym em i piah kiwa yahkhmat, wei da e ko chiboon ki Scheme wot ya ki khynroo ha sor kiwa boon da yoh kreh lyngba ka Start Up Meghalaya.
Hawa kylli ya iwa yatoh wa ki kaam khayi mooyong iwa da jooh klam ko ha ki por wa em ko ha ka liang pyrchah, da ong ko wa ym toh u kdaw kti du ya kawi ka seiñ deiwa pynrap wa kani ka sorkar emkaam ko wow pynbait wei wow leh iyi iyi yow khayi laitlooid ya u mooyong neibhah kiwa chong chnong ka Jaiñtia Hills wa West Khasi Hills ym em de ki da kiwi ki kaam wow pyndap pynbiang ya idæ.
Heiyatoh wa i kaam pynbait pood wa ka jylla Assam, ka Dr. Ampareen da ong ko wa ympu em kawon kawon ka sorkar wa nood wow batai bniah ya itai i emkaam wow pynbait ya u pood u ang.
Da ong ko leh wa i jia ha Mukroh da piah u dohnood i, tangwa hadien ini i jia da em i yaklam hapyrdi ki ar ngut ki Montri Rangbah ki ar kylla. Wei da ong ko leh wym ye wow pynhun lut ya waroh wei lada bichni bait kamni ym poi i cha ka thong.
Ka NPP ha kani ka sngi da pynyoo lang ko ya waroh ki 6 ngut ki kyrtong yong ka napoh Shillong kiwa kyntup ya u Rocky Hek na Pynthorumkhrah Constituency, u Teiborlang Pathaw na Mawlai Constituency, ka Dr. M. Ampareen Lyngdoh na East Shillong Constituency, u Ransom Sutnga na North Shillong Constituency, u Mohendro Rapsang na West Shillong Constituency waka Jasmine Mary Lyngdoh na Nongthymmai Constituency.
