Ka National People’s Party (NPP) ynne ka sngi da pdiang sñiawbha ko ya u MLA warim uwa jooh man leh u Montri warim ka jylla, u Nehlang Lyngdoh hadien wa rai u wow uiñ cha ka kaam saiñ pyrthai ryngkat wa kiwa kyrchaan na Khliehriat Constituency.
U Nehlang da chongngiah u na ka saiñhima, hadien wa da jop u 2 sien kam u MLA ka Indian National Congress (INC) na Rymbai kawa man katni kam ka Khliehriat Constituency heiwa da jooh man u leh kam u Montri ha ka sorkar jylla hadien wa jop u ha u snem 2003 wa 2008.
Hawa klam ha ka yalang wa tbian, u Sniawbhalang Dhar uwa man leh u Working President ka NPP ha Meghalaya, da ong u wa u Nehlang toh uwa da paaw bha ha ka jylla, tangwa da iehnoh u ya ka saiñhima chipor wei i wan yong u MLA warim daw pynkhlan chooh chooh ko ya ka Party.
Neiliang u National Vice President, u Prestone Tynsong da ong u wa ka Party dang ku ko neipor cheipor wei da pynrap u wow lai cha ki paidbah emkaam ya ka thong kammon wow chakri ya ki paidbah lada wan biang ha i bor ha u snem 2023.
U National President ka NPP, u Conrad K Sangma da pdiang sñiawbha u ya u Nehlang wa kiwa kyrchaan deiwa ong wa kani ka sngi da kynjoh ko cha uwi tawon u moomær wa thymme neibhah u Nehlang uwa jooh man u MLA wa Montri warim emlang u wa ka Party.
Hawa yaklam wa u Nehlang da pynsñiaw u wa i wan uiñ biang u cha ki kaam saiñhima toh hadien wa da sangeh u chipor, weiwa da chem wei da yoo u wa boon ki kaam wa sahteiñ ha ka Constituency yong oo.
Da ong u leh i daw wa uiñ u toh nei sahdien ka thaaiñ deiwa pynrap wa ini i wan yong oo toh hajrong ka yurim wa kwah u wow pynwandur biang ya ka Constituency wei hajrong ini da paan yarap biang u na ki paidbah wow emlang biang wa oo ha kani ka kynti khnang wow ye u pynjop ya i thmu wa em u kamjooh i yong ki paidbah.
U Nehlang da ong u wa i rai wow psiah cha ka NPP toh neidaw wa yoo u wa man ko ka Party kawa skem.
