Uwa yahkamat ka chnat khynroo ka Congress ha Assam uwa jooh man kam u Vice President ka Tinsukia District Youth Congress da lai psiah u chapoh ka seiñ kieñ suloi wa yahkhmat da u Paresh Baruah kawa tip kam ka United Liberation Front of Asom (ULFA-I).
Uni uwa yahkhmat ka Congress toh uwa tip kam u Janardan Gogoi wei yeini wa lai psiah u chapoh ka ULFA-I da pyntikna da oo hi ha iwa thoh u ha ka Facebook Profile u heiwa da mih u na chnong wa sah u ha Sadiya, Uday Nagar yow lai cha ka thaw rieh ka ULFA-I wa em ha Myanmar.
Ha ka chithi wa thoh u cha ka kurim u kawa da booh u leh ha Facebook da khana u yei daw wa lai psiah u cha ka ULFA-I deiwa ong u wa katni ki bru yong ki da man ki ki wym em bor de pyn hapoh ka chnong ka thaw yong ki hi wei ym ye de u wow pait yei chah ktah ka jaitbru kiwa da chah thok chah chukor wei chah chim kabu da boon snem.
Da ong u wa em kiwa da sooh buit yow pyndooh ya ki jaitbru Assamese wei da em ki bru wa ki seiñ saiñ hima ka thaaiñ kiwa da chna poisa hei pyrtuid ki jaitbru Assam.
Da ong chooh chooh u wa kani ka sorkar da rem ko dei wym ye ko u ap yeiwa pyrchah ki bru kiwa da leh katakm ka synchaar paidbah wei ym em laad de da iwi lait nei rah suloi neibynta ki Assamese.
