I em ka kong Chiarmon Dkhar, ha ka chong Wapungskur, da man sakhiat i i kyrkhu iwa khroo bha ya ki manyung mansem wa dooh wa duk ha ki dong wa em hapoh yong ka chnong Wapungskur, East Jaiñtia Hills, ha kawa kam kani ka por wa kordit.
Kam wow pynkynmoo, ka kong Chiarmon Dkhar, ymtoh ka wakreh sorkar lane kawa mihkhmat paidbah lane kawa ksoh ya kawon kawon ka kaam wa pawkhmat la ha kawon kawon ka bynta leh, tangwa man ko du ka bru kynthai, wa ka bru paidbah kam wa man hi kiwi tawan ki kynthai. Tangwa iwa phær iwa em ha ka, toh wa man ko ka bru kawa em yei mynsien yoowyrai barabor ya kiwa chem jynjar chem chitom. Ya ini i man i long yong ka ye u sakhi na ki chiboon ki kaam wa bha wa ka da leh ko ha ka imlang ka sahlang, khamtam ya ki kup chilliang sem chilliang.
Ka kong Chiarmon Dkhar, ka manbei deiwa kyllooid mynsien, ynne ka sngi kamwa da dep leh chwa ko nadooh ini i por wa da dep, da pteiñ biang ko yei kaam lehwyrai yong ka deiwa e yarap chooh chooh ko sa cha ki 58 tylli ki manyung wa dooh wa duk yong ka Dong Snahleiñ, Wapungskur kiwa da chah ktah sakhiat neidaw yong i khang chnong ha waroh kawi ka ri India, deiwa e yarap ko cha man la kawi pa kawi na kitai ki thlu yung da u khoo, i blooh wa u salah phareng.
Ka kong Chiarmon Dkhar, da leh ko ya kani ka kaam hapyrdi i emlang yong kiwa yahkhmat yong ka Dong Snahleiñ, nadooh u Chairman u Heplis Ryngkhem, u Secretary u Sunshine Dkhar wa kiwi kiwi tawan ki waheh yong ka dong.
Ha chwa u saam ya kini ki tiar ki tar cha kitai ki manyung, da yoh yei klam yakhmat wei klam sñiawngooh na ka dong ya ka kong Chiarmon Dkhar, bood won sa i ngooh Blai da u H. Deolangki Dkhar, u Finance Secretary yong ka dong.
Ka kong Chiarmon da ong biang ko leh wa, kani ka kaam yong ka, ym kut ko du myntu ka sngi wei daw pteiñ chooh chooh ko ya kani ka kaam lehwyrai yong ka ya kiwa chem chitom chem jynjar sakhiat neidaw yong kani ka khang chnong ha ka ri India heiyatoh wei em ka kjut khlam COVID-19.
Discussion about this post